Ўзбекистон Президенти Шавкат Мирзиёев Олмалиқ шаҳридаги «Jurabek laboratories» қўшма корхонаси фаолиятини кўздан кечирди. Бу ҳақда Президент матбуот хизмати хабар қилди.
Маълум бўлишича, корхона 48 миллион флакон инфузион эритмалар, 480 миллион дона ампула, 60 миллион дона қуруқ антибиотиклар, 20 миллион дона лиофилизация қилинган дори шаклларини ишлаб чиқариш қувватига эга.
Бу ерда GLP лабораторияси мавжуд, халқаро GMP стандарти жорий этилган.
Корхона томонидан 300 турдан ортиқ дори воситалари давлат рўйхатидан ўтказилган. 15 дан ортиқ хорижий давлатларга экспорт қилинмоқда.
Бугунги пандемия даврида жуда муҳим бўлган ремдесивир, фавипиравир, гепарин, эноксапарин каби дорилар ҳам ишлаб чиқарилмоқда.
Биотехнологиялар соҳасида моноклониал антитаначалар туридаги дори воситаларини ишлаб чиқариш бўйича 30 миллион долларлик янги лойиҳага киришилган.
Корхонада коронавирусга қарши вакцина ишлаб чиқариш мўлжалланмоқда.
Шавкат Мирзиёев шу борадаги техник имкониятлар билан танишди.
Эслатиб ўтамиз, аввалроқ август ойидан бошлаб мамлакатимизда Спутник-V вакцинаси ишлаб чиқариилиши ҳақида хабар қилинган эди.
