Охирги тўрт йилда хориждаги ватандошларни қўллаб-қувватлаш, улар билан алоқаларни мустаҳкамлаш, ҳамкорликни ривожлантириш, меҳнат мигрантларининг ҳуқуқ ва манфаатларини ҳар томонлама ҳимоялаш давлатимиз сиёсатининг муҳим йўналишларидан бирига айланиб, ватандошлар билан изчил ҳамкорлик йўлга қўйилди.
Давлатимиз раҳбарининг мустаҳкам сиёсий иродаси туфайли кўплаб ватандошларимиз юртимизга қайтиб, иқтисодиётимиз, ижтимоий соҳа, илм-фан, маданият, спорт ва бошқа йўналишларни ривожлантиришга муносиб ҳисса қўшиб келмоқда. Юқори малакали мутахассислар давлат ва хўжалик бошқаруви органлари, жойлардаги ижро ҳокимияти ва бошқа ташкилотларда раҳбар ва масъул лавозимларда фаолият юритмоқда.
Президентимиз томонидан куни кеча имзоланган “Ватандошлар” жамоат фондини ташкил этиш тўғрисида”ги қарор хорижда истиқомат қилаётган ватандошларни тарихий Ватани атрофида янада жипслаштириш, уларнинг қалби ва онгида юрт билан фахрланиш туйғусини юксалтиришга қаратилгани билан аҳамиятлидир.
Унга биноан, “Ватандошлар” жамоат фонди ташкил этилиб, хорижда истиқомат қилаётган ватандошлар ва улар томонидан тузилган жамоат бирлашмалари билан ҳамкорлик алоқаларини йўлга қўйиш ва ривожлантириш, хорижда мураккаб ҳаётий вазиятга тушиб қолган ватандошларни белгиланган тартибда моддий ва ижтимоий қўллаб-қувватлаш, уларга ахборот жиҳатидан ва ҳуқуқий ёрдам кўрсатиш кабилар ушбу Фонд фаолиятининг асосий йўналишлари этиб белгиланди.
Фонд маблағларини шакллантириш манбаларини давлат субсидияси ва давлат ижтимоий буюртмаларидан келиб тушадиган маблағлар, муассислар томонидан ажратиладиган маблағлар, юридик ва жисмоний шахсларнинг ҳомийлик хайриялари, юридик ва жисмоний шахслар, хорижий ва халқаро ташкилотлар, хорижий давлатларнинг грантлари, Фонд маблағларини тижорат банкларида депозитга қўйишдан олинадиган ҳамда Фонднинг тадбиркорлик фаолиятидан олинадиган даромадлар ташкил этади.
Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди эса маблағларини бошқариш бўйича Парламент комиссиясига ҳар йили асосланган буюртманома асосида Фонднинг асосий вазифаларини бажариш доирасидаги тадбирларни ташкил этиш ва ўтказишни молиялаштириш учун субсидия шаклида зарур маблағлар ажратади.
Ҳақиқатдан, кейинги йилларда хориждаги ватандошларимизнинг ҳуқуқларини ҳимоя қилиш, шароитларини яхшилашга эътибор янада кучайди. Россия, Қозоғистон, Туркия, Япония ва Бирлашган Араб Амирликлари билан меҳнат миграцияси борасида халқаро шартномалар имзоланди. Энг муҳими, хорижда ишлаб, малака орттириб қайтган фуқароларнинг тадбиркорлик ташаббуслари давлат томонидан қўллаб-қувватланмоқда.
Аҳамиятли томони, жойлардаги сектор раҳбарлари ўз ҳудудидаги шундай ташаббускорлар рўйхатини шакллантириб, уларнинг бизнес лойиҳасини амалга оширишларига яқиндан кўмаклашмоқда. Шунингдек, тадбиркорликни бошлаш учун кредит ресурслари ажратилган ҳолда, банк кредитлари таъминоти бўйича суғурта полиси харажатларининг бир қисми ҳам қоплаб бериляпти. Бунинг натижасида кўплаб тадбиркорлик субъектлари ташкил этилиб, ишлаб чиқариш хажми ошган ҳолда, янги иш ўринлари яратилаётир.
Хулоса ўрнида таъкидлаш жоизки, яқин-яқингача кўпчилик юртдошларимиз турли сабабларга кўра, чет элларга кетиб бор билим ва кўникмаларини, салоҳиятларини ўзга юртларга намоён қилиб келаётган эди. Сўнгги тўрт йилда янги Ўзбекистонда олиб борилаётган изчил ислоҳотлар натижасида уларнинг кўпчилиги Ватанимизга қайтди. Шу нуқтаи назардан мазкур қарорнинг ижроси хорижда истиқомат қилаётган ватандошларни тарихий Ватани атрофида янада жипслаштиришга хизмат қилишига ишонаман.
Актам ҲАИТОВ,
Олий Мажлис Қонунчилик палатаси
Спикери ўринбосари
