Тошкент шаҳар ҳокими Жаҳонгир Ортиқхўжаев Сергели туманида сайёр қабул ташкил этди.
Унда Чоштепа МФЙда яшовчи Шуҳрат Аҳмедов Тошкент вилоятига қарашли ҳудудда светофор ўрнатиш зарурлигини айтган ва унинг мурожаатига нисбатан ҳоким қуйидаги фикрларни билдирган.
– Айрим мурожаатчилар бор – фақат ўзининг муаммосини кўтариб келади. Кўринишидан ўзига тўқ одамга ўхшайди, бироқ ҳоким билан учрашганидан фойдаланиб, шахсий муаммосини айтади. Айримлар бор, ўзи учун эмас, аҳоли учун бирор муаммони ҳал этишимизни сўрашади. Бу мурожаат ҳам худди шундай. Вилоят ҳудудига светофор ўрнатиш керак бўлса, ўрнатамиз. Муҳими, машиналар қатновига, аҳолига ноқулайлик туғдирмаса бўлгани, – дейди Жаҳонгир Ортиқхўжаев.
Шунингдек қабулда “Эзгулик” МФЙда яшовчи Гулноза Нусратова "Сергели 8 А" мавзесидаги 16-уйдан 301-мактабгача йўлнинг остидан ўтган “Сувсоз” давлат унитар корхонасига тегишли бўлган қувурларни алмаштириш ва йўлни таъмирлаш масаласини ижобий ҳал этиш учун сайёр қабулга келганлигини билдирди. Ҳокимнинг топшириғига биноан тегишли ташкилотлар жорий йилнинг 15 апрелидан қувурларни янгилашга киришадиган бўлди.
70 ёшли Ғани бобо Ашрафов Сергели тумани Чоштепа маҳалласи, Ўзгариш кўчасининг ҳамма тор ва берк кўчаларида ҳеч қандай канализация йўқлигини маълум қилди. Мутасаддилар ҳудудни ўрганиб, лойиҳа тайёрлаши, маҳалла канализацияси 2020 йил дастурига киритилиши маълум қилинди, дея хабар қилди ЎзА.
