Ўзбекистонда ҳукумат мажлиси бўлиб ўтди. Бу ҳақда EVERYDAY.UZ мухбири хабар қилди.
Кун нашрининг ёзишича, йиғилишда бош вазир қабулхоналарига келиб тушаётган мурожаатлар ижроси муҳокама қилинган. Шунингдек, йиғилишда тўғридан тўғри хорижий инвестициялар ва кредитлар жалб этиш, йирик ишлаб чиқариш қувватларини ишга туширишни таъминлаш борасидаги ишларда йўл қўйилган камчиликлар ҳам кўриб чиқилган. Йиғилиш якунига кўра ушбу ишларда йўл қўйилган камчиликлар учун мутасаддилар жазога тортилган.
Хусусан, йиғилишда соғлиқни сақлаш вазирининг биринчи ўринбосари Амрилло Иноятов, Сирдарё вилояти ҳокими ўринбосари Дониёр Мадримов, Фарғона вилояти ҳокими ўринбосари Иқбол Эргашев ва Тошкент шаҳар ҳокими ўринбосари Шароф Раҳмоновга интизомий жазо чораларини қўллаш тўғрисида қарор қабул қилинган.
Таъкидланишича, январь-сентябрь ойларида бош вазир қабулхоналарига 68 705 та мурожаат келиб тушган ва уларнинг 67 220 таси кўриб чиқилган. Шуларнинг 37 225 таси ёки 55,4 фоизи ижобий ҳал этилган.
