Ўзбекистонлик актриса Жайрона Ҳасанова ОАВга берган интервьюсида ҳомийлар билан бўлган мулоқотини эслаб, бугунги кунда санъат соҳасида рўй бераётган ҳодисалар ҳақида гапирди.
Хусусан, Жайрона янги чиқиб келаётган актрисалар ҳақида ҳам фикр билдирди. Актриса уларнинг иродасиз, сабрсиз эканлигини айтиб, танқид қилди.
“Мен шунақа қизларни биламан. ‘Мен эрга тегиш учун санъатга киряпман’ деганлар бўлган. ‘Иккинчи хотин бўлсам ҳам бўлди, мендан хабар олиб турса, пул бериб турса, ‘кайф’ қилиб ўзим учун яшашим керак’ дейдиган қизлар учун ҳам санъат бузилиб кетяпти. Пули борлар ҳам бузяпти, чунки пулим борки ҳаммасини сотиб ололиман дейдиганлар бор”, – дейди актриса.
Шунингдек, интервью давомида Жайронa аввал хонанда бўлишни хоҳлаб ҳомийлар билан учрашганини, улар билан бўлган мулоқотни ҳам эслади.
“Менга шунақа таклифлар чиққанки, ‘майли менга ўйнаш бўлсанг сени хонанда сифатида кўтараман’ дейишган. Деярли ҳамма шунақа таклиф билдиради. Яна ‘биричи қўл бўлиши керак’ дейишади. ‘Биринчи биздан ўтишинг керак, кейин шундоқ ҳам дабдаланг чиқиб кетади’ дейишади. Улар ‘иқтидоринг билан зўр бўлиб кета олмайсан’ деган гап қилишади. ‘Биринчи биздан ўтсанг сўраган пулингни берамиз’ дейишади”, – дея қўшимча қилди актриса.
Жайрона бундай таклифлар унга тўғридан-тўғри билдирилмаганини, ўртадаги одам орқали ушбу таклифлар айтилганини таъкидлаган. Шунингдек, актриса таклиф билдирганларга рад жавобини берганда улар мана-ман деган юлдузлар, ҳатто ўзининг кучи билан танилган қизлар ҳам қўли кўксида ҳомийлар олдида туришларини айтиб, мақтанишганини эслади.
Маълумот ўрнида, Жайрона Ҳасанова бугунги кунда ТВда эфирга узатилаётган “Қора атиргул” сериалидаги Мунира роли билан танилиб бормоқда.
