Хонанда бу ҳақда TBLD лойиҳаси учун берган интервьюсида тўхталиб ўтган. Санжай Карвон қўшиғини кавер талқинида куйлаш ғояси унда 15 йилдан бери борлигини айтди. Дастлаб у Шерали Жўраев билан дуэт куйлашни хоҳлаганини билдирди.
“Менимча у (Шерали Жўраев – таҳр.) ҳалигача бу ҳақда билмайди. Ваҳолангки мен унга илтимосимни етказиб қўйишни сўрагандим. Якунда илтимосим манзилга етиб бормади”, – дейди Санжай.
Эслатиб ўтамиз, аввалроқ Санжай Шерали Жўраевнинг ўғли Зоҳиршох Жўраевдан отасидан унинг қўшиғини куйлашга рухсат олиб беришини сўраганини айтган эди. Санжай тармоқдаги саҳифалари орқали у билан ёзишмасини ҳам ошкор қилган эди.
Санжай агар Шерали Жўраев қўшиқни куйлашга қаршилик билдирганда "бу бўйича муаммо юзага келмаган бўлар эди" деган. Шунингдек, интервью давомида Санжай бу қўшиқни бошқа куйламаслигини таъкидлади.
“Мен бу қўшиқни бошқа куйламаслик бўйича ариза ёздим”, – дейди Санжай.
Хонанда Жўраевлар оиласидан ҳафа эмаслигини, лекин қўшиқ ва клипни ҳеч қаердан ўчирмаслигини маълум қилди.
