Сирдарё вилоятида ҳуқуқ-тартибот идоралари ходимлари томонидан фуқаронинг уйидан салкам 14 килограмм марихуана ва 1,68 грамм гашиш топилди. Бу ҳақда ИИВ матбуот хизмати хабар берди.
Дастлаб ҳуқуқ-тартибот идоралари ходимлари Оқолтин туманида яшовчи А.Ф.нинг бошқарувидаги “Ласетти” русумли автомашинани тўхтатди. Автомобилни кўздан кечириш чоғида олд ўриндиқ остидан 111 грамм марихуана топилиб, кейинчалик ашёвий далил сифатида олинди.
Кейинчалик маълум бўлишича, ушбу шахс гиёҳвандлик моддасини Сайхунобод туманида яшовчи С.Ш.дан 2 миллион сўмга сотиб олган..
С.Ш.нинг уйини текшириш чоғида ётоқхонадан тўртта гугурт қутисига солинган гашиш, кичик полиетилен пакетларга қадоқланган қуруқ марихуана ва каноп уруғлари топилган.
Яшаш хонасидан учта полиетилен пакетга, электрон тарози, туби бўлмаган пластик шишага ўралган марихуана ҳам топилган.
Бундан ташқари, ертўладан иккита полиетилен пакетга солинган марихуана, дарахт шохлари тўпланган жойидан агротехник ишлов берилган 5-10 см узунликдаги 8 дона каноп туплари топилиб, ашёвий далил сифатида олинди.
Тадбир давомида 13879 грамм марихуана ва 1,68 грамм гашиш гиёҳвандлик моддаси мусодара қилинди. Ҳозирда тергов ҳаракатлари олиб борилмоқда.
