Бўстонлиқ тумани йўл қурилиш бошқармаси бошлиғи ўринбосари ер участкасини ноқонуний равишда сотмоқчи бўлган вақтида қўлга олинди, деб хабар берди ИИВ матбуот хизмати.
Жорий йилнинг 6 май куни аёл ички ишлар органларига мурожаат қилиб, Тошкент вилояти ҳудудидан ер участкаси излаш жараёнида у илгари танимаган фуқаро билан танишиб қолганини маълум қилган. Номаълум эркак жабрланувчига таниши 2,4 гектар ерни 980 минг АҚШ долларига сотмоқчи эканлигини айтган. Улар 98 минг АҚШ доллари миқдорида 10 фоиз олдиндан тўлов олиб, юқори мартабали танишлари орқали ушбу ер участкасини қайта расмийлаштириш учун ҳужжатларни тайёрлаб беришларини ваъда қилишган.
Махсус тадбир давомида икки нафар фуқаро жабрланувчидан 49 минг АҚШ доллари аванс пулини олаётган вақтда қўлга олинди.
Қўлга олинганлардан бири Бўстонлиқ тумани йўл қурилиш бошқармаси бошлиғи ўринбосари бўлган.
Мазкур ҳолат юзасидан жиноят содир этган шахсларга нисбатан Ўзбекистон Республикаси Жиноят кодексининг фирибгарлик моддаси билан жиноят иши қўзғатилган. Уларни 10 йилгача қамоқ жазоси кутмоқда.
