Ўзбекистон пойтахтида Iphone 11 Pro смартфонини сотиб олган икки маҳаллий фуқаро унинг собиқ эгасини шантаж қилишга уринган, деб хабар бермоқда Тошкент шаҳар ИИБ.
Гап шундаки, улар сотиб олинган телефонда интим суратларни топишган. Ёшлар Iphone 11 Pro’ни 500 долларга сотиб олган ва собиқ эгасини ундаги барча маълумотларни ўчириб ташлашига ишонтирган.
Кейинроқ собиқ эгаси Баҳодирга телефонни сотиб олганлардан бири қўнғироқ қилган. Валижон исмли йигитнинг айтишича, унинг Iphone’ида интернетга тушиб қолиши мумкин бўлган суратлар бўлган. Бунинг олдини олиш учун собиқ эгаси 1,5 минг доллар тўлаши керак бўлган. Баҳодир бор-йўғи 700 долларим бор, деб жавоб берган. Шантажчи бу миқдорга рози бўлган.
Жабрланувчининг яқинлари унга ҳуқуқ-тартибот идораларига мурожаат қилишни маслаҳат беришган. Учрашув жойи ва вақтини белгилаб, ходимлар товламачиларни қўлга олишган. Валижон ва унинг шериги Зокиржон “Товламачилик” моддаси билан жиноий жавобгарликка тортилган. Улар 3 йилдан 5 йилгача озодликдан маҳрум этилиши мумкин.
