Ўзбекистонда 2022 йилги Ҳаж мавсумига бир нафар ҳожи учун тўлов миқдори 62,9 миллион сўм этиб белгиланди. Шунингдек, жорий мавсумда ўзбекистонлик зиёратчилар учун квота 7200 нафардан 10865 нафарга оширилди. Бу ҳақда АОКАда бўлиб ўтган брифингда Дин ишлари бўйича қўмита ахборот хизмати раҳбари Илҳом Маъруфов маълум қилди.
Таъкидланишича, нархларнинг ошишига Саудия Арабистони ҳукумати томонидан зиёрат нархига таъсир этувчи қўшимча солиқлар ва мажбурий тўловлар жорий этилгани, коммунал, транспорт ва бошқа хизматлар учун тўловлар миқдори бир неча бараварга (30-40 фоизга) ошгани сабаб бўлган.
2022 йилда зиёратларни ташкил этувчи муассасалар хизматлари учун янги мажбурий тўловлар жорий этилади. Шу боис дунё мамлакатлари учун ҳаж хизматлари нархи ўртача 40-45 фоизга ошган.
Саудия томони билан олиб борилган музокаралар натижасида жорий йилда Ўзбекистон фуқаролари учун жами 10 865 кишилик квота белгиланди. 2019-йилда бу кўрсаткич 7200 кишини ташкил этди.
Саудия Арабистони ҳукумати бу йилги Ҳаж зиёратини адо этиш учун хорижликлар ва маҳаллий фуқароларга қуйидаги талабларни қўйди:
- Саудия Арабистони Подшоҳлиги Ҳаж ва Умра вазирлиги томонидан ўрнатилган қатъий карантин талабларига мувофиқ, 2022 йилги Ҳаж мавсумида қатнашиш учун ёш чегараси 65 ёш этиб белгиланди. Ушбу ёш чегараси 1957 йил 30 июнгача туғилган шахсларни ўз ичига олади;
- Саудия Арабистони Подшоҳлиги Соғлиқни сақлаш вазирлигининг талабларига кўра, зиёратчилар Жаҳон соғлиқни сақлаш ташкилоти томонидан тасдиқланган Pfizer / BioNTech (АҚШ-Хитой), Oksford-AstraZeneca (Буюк Британия-Шветсия), Moderna (АҚШ) ва Johnson & Johnson (АҚШ) вакциналари билан эмланиши керак;
- Барча саёҳатчилар Саудия Арабистони Соғлиқни сақлаш вазирлиги талабига биноан 4 валентли менингит вакцинаси билан эмланган бўлиши керак;
- Барча фуқаролар Саудия Арабистонига киришдан 72 соат олдин олинган коронавирус учун салбий ПCР сертификатини тақдим этадилар.
- Ўзбекистонлик зиёратчилар жорий йилнинг 18-30 июн кунлари Тошкент – Мадина, Бухоро – Мадина, Наманган – Мадина, Самарқанд – Мадина, Қарши – Мадина, Урганч – Мадина, Нукус – Мадина йўналишлари бўйича Ҳаж зиёратига боради. Улар 14-31 июл кунлари худди шу йўналишларда қайтади.
