Ҳозирги кунда мазкур дастурларни яратиш устида тизимли ишлар олиб борилмоқда. Хусусан, хориждан керакли лаборатория жиҳозлари олиб келиниб, чет эллик мутахассислар иштирокида семинар-тренинглар ўтказилмоқда. Шунингдек, дастур доирасида Самарқанд давлат университети профессор-ўқитувчилари дунёнинг етакчи олий таълим муассасалари ва лабораторияларида стажировка ўташи белгиланган.
Акмал Сафаров айни кунларда мазкур грант доирасида дунё университетлари рейтингида 1-ўринда турувчи АҚШ нинг Массачусетс технология институтида стажировка ўтамоқда.
- Менинг мақсадим, Массачусетсда мавжуд бўлган ядро реакторларининг физик асослари бўйича материаллар билан танишиш, уларни мукаммал ўрганиш ва Самарқанддаги лабораториямизда уни татбиқ этиш, - дейди Акмал Сафаров. – Бу ерда реакторларни моделлаштиришга қаратилган янги OpenMC дастури мавжуд бўлиб, бу дунё бўйича шу соҳадаги энг сўнгги моделлардан биридир. Айни кунларда биз ҳам ушбу дастурни ўрганиб, Самарқанд давлат университетида янги барпо этиладиган Ядро реакторлари лабораториясида уни жорий этиш устида ишламоқдамиз. Шунингдек, биз мазкур дастур базаси ёрдамида СамДУ бакалавр ва магистратура босқичи талабалари учун янги лаборатория ишларини яратишимиз мумкин. Бундан ташқари OpenMC дастури докторантларга ядро реакторларини моделлаштиришга қаратилган диссертация ишлари устида илмий иш олиб бориш имкониятини беради. Фақатгина бунда талабаларимиздан инглиз тили ва Python дастурлаш тилини мукаммал билиш талаб этилади. Яна бир қизиқарли ва фойдали томони шундаки, OpenMC дастури ядро реакторларини суперкомпьютер (кластер) ларда моделлаштириш имкониятини беради ва у мутлақо бепул.
Шунингдек, OpenMC дастури, докторантларга хам ядро реакторларини моделлаштиришга каратилган диссертация ишлари устида илмий иш олиб бориш имкониятини беради.
Акмал Сафаров физика-математика фанлари бўйича фалсафа доктори (PhD), олимнинг 2021 йилда Scopus базасидаги журналларда мақолалари сони 5 та, Scopus базасидаги h индекси 4 га тенг. Шунингдек, у рус ва инглиз тилларида эркин сўзлаша олади.
Отабек Саъдуллаев,
Самарқанд давлат университети
Ахборот хизмати ходими.
