Самарқанд давлат университети физикавий ва коллоид кимё кафедраси ассистенти Машҳура Тагирова “Нано ва микроқобиқларда антиоксидант ферментларни иммобиллаш” мавзусида илмий тадқиқот билан шуғулланиб келади. Шу кунга қадар 20 дан ортиқ мақолалари республика ва халқаро нашрларда чоп этилган. 3 та мақоласи Scopus ва WEB of Science базасидаги журналларда нашрдан чиққан. Россиянинг Москва, Саратов, Новосибирск шаҳарларида халқаро конференцияларда иштирок этган. Ломоносов номидаги Москва давлат университети аспирантурасида таҳсил олган.
– Маълумки, одам организмдаги кислороднинг актив формалари синтези жараёни назоратдан чиқиб кетганда кўплаб касалликлар юзага келиши мумкин, - дейди Машҳура Тагирова. - Менинг тадқиқотим тирик организмларда учрайдиган антиоксидант ферментларни имобиллаш орқали уларнинг фаоллигини ва барқарорлигини оширишга мўлжалланган.
Антиоксидант ферментларни ўсимликлар таркибида кўп учрайди. Асосан оқсил кўринишида бўлади. Саноат, тиббиёт, фармацевтика, ишлаб чиқариш соҳаларида зарур ҳисобланади. Уларнинг вазифаси организмдаги кислородни атомар кўринишдан молекуляр кўринишга ўтказади, содда тарзда айтсак, зарарли кўринишдан зарарсиз ҳолга келтиради. Антиоксидант ферментларни қўллаш кислород актив формаларини боғлашнинг энг самарали усули ҳисобланади. Шу муносабат билан антиоксидант ферментларни инактивланишдан ҳимоя қилиш имконини берадиган нано ва микрокобиқларда оқсилни ўз ичига оладиган антиоксидант тизимларини яратиш ва амалиётга тадбиқ қилишга катта эътибор қаратмоқдамиз. Шу билан бирга уларда юқори ферментатив фаоллик ва барқарорликка эга антиоксидант ферментларни олиш ҳамда уларни тиббиёт ва саноатда қўллаш имкониятларини ўрганмоқдамиз.
Ирода Бекмуродова
Самарқанд давлат университети
Ахборот хизмати ходими.
Шавкат Акрамов олган суратлар.
