Самарқанд давлат университети ноорганик кимё ва материалшунослик кафедраси ўқитувчиси Дилором Қурбонова “Металлар ва уларнинг хоссаларига тегишли айрим мавзуларни ўқитиш методикасини инновацион технологиялар ёрдамида такомиллаштириш” мавзусида илмий тадқиқот олиб боради. Шу кунга қадар мазкур мавзу бўйича 15 га яқин мақолалар муаллифи. Индонезия, Белгия, Россия, Қозоғистон, Тожикистон каби давлатларнинг нуфузли нашрларида мақола чоп эттирган. Умумий кимё йўналишида 5 га яқин ўқув ва ўқув-услубий қўлланмалар муаллифи. Дилором Қурбонованинг “Умумий кимё” дарслиги кимё ва биология ўқитиш методикаси йўналиши талабалари учун асосий дарслик сифатида хизмат қилмоқда.
![Кимё фанини ўқитишда инновацион технологиялар қанчалик муҳим?]()
– Инновацион технологиялар ҳар бир соҳа учун ниҳоятда керак, - дейди Дилором Қурбонова. - Шу жумладан кимё ўқитиш методикасига ҳам. Кимё ўқитишда ўқувчиларнинг билим савияси, ўзлаштириш қобилияти, таълим манбаи, дидактик вазифаларига қараб, муносиб равишда метод танлаш, таълим жараёнини инновацион технологиялар ёрдамида такомиллаштириш муҳим ҳисобланади.
Яқинда олиманинг таълимда табиий фанлар самарадорлигини оширишга доир мақоласи Индонезиянинг нуфузли “Web of Scientest: International scientific research” номли журналида нашр этилди.
Ирода Бекмуродова
Самарқанд давлат университети
Ахборот хизмати ходими.
Шавкат Акрамов олган суратлар.
