Тадбирни Самарқанд давлат университети ректори, профессор, Олий Мажлис Сенати аъзоси Рустам Холмуродов очиб, Шароф Рашидовнинг давлат ва жамоат арбоби сифатида олиб борган фаолияти ҳақида фикр билдирди.
– Бугун Самарқанд давлат университетида Шароф Рашидов хотирасини абадийлаштириш бўйича бир қатор ишлар амалга оширилмоқда, - дейди Рустам Холмуродов. - Шароф Рашидов музейини барпо қилиш бўйича ҳаракатлар бошланган. Филолог олимларимиз Шароф Рашидовнинг кўп томликларини нашрга тайёрлаш ва чоп этиш ташаббусини илгари суришмоқда. Шу билан бирга Шароф Рашидовнинг Ўзбекистон тарихида тутган ўрни бўйича алоҳида тадқиқот олиб бориш режалаштирилган. Гуманитар факультетлар талабалари учун Шароф Рашидов номидаги стипендия ташкил этиш юзасидан таклифлар билдирилмоқда. Шароф Рашидов номининг энг қадимий, энг салоҳиятли, энг улуғвор, Улуғбек мадрасасининг вориси, олти асрдан буён бутун жаҳонга илм-маърифат таратаётган даргоҳга берилиши, бу жуда катта тарихий воқеадир.
Шароф Рашидов хотирасига бағишланган кеча таниқли арбобнинг замондошлари, фарзандлари ва авлодларининг Шароф Рашидов ҳақидаги хотиралари билан самимий ва очиқ руҳда ўтди.
Республикамизни жуда оғир ва мураккаб йилларда бошқарган, эл-юртимиз шаъни, Ватанимиз нуфузи йўлида садоқат билан хизмат қилган атоқли давлат арбоби, таниқли ёзувчи Шароф Рашидов фаолиятини халқимиз тарихидан айри ҳолда тасаввур этиб бўлмайди. Айниқса, Шароф Рашидов таьлим олган ва номи берилган Самарқанд давлат университети майдонида Шароф Рашидов ёди абадий бўлиши шарт. Бу борада ёш авлодни унинг фаолияти ва асарларидан хабардор бўлиши муҳим масала ҳисобланади. Тадбир доирасида ушбу вазифани амалга оширишнинг ўзига хос кўриниши бўлган “Шароф Рашидов ва унинг фаолияти жамоавий хотирасининг визуал ҳужжатли базаси интерактив харитаси” лойиҳаси тақдимоти ўтказилди.
– Шароф Рашидов ҳаёти ва фаолияти шонли тарих саҳифаларида муҳрланишга дахлдор йўлдир, - дейди Гулнора Рашидова. - “Шароф Рашидовнинг фаолияти жамоавий хотирасининг визуал ҳужжатли базаси интерактив харитаси” лойиҳаси Шароф Рашидовнинг давлат арбоби ва ижодкорлик фаолияти билан боғлиқ манба ва маълумотлардан иборат виртуал музей ташкил этишга асосланган. Мазкур лойиҳа давлат арбобининг ҳаёти билан боғлиқ муҳим маълумотлар ҳамда жамиятдаги фаолиятининг у ёки бу кўринишлари акс этган 110 мингдан ортиқ суратларни ўзида жамлаган фотоархив ташкил этишни кўзда тутади. Бу каби саъй-ҳаракатлар Шароф Рашидов ижоди ва фаолиятини ёш авлодга ўргатишда муҳим қадам бўлиши шубҳасиз.
Тадбирнинг якуний қисмида Самарқанд давлат университетига Шароф Рашидов номидаги Халқаро жамоат фонди томонидан “Шароф Рашидовнинг давлат ва жамият фаолияти жамоавий хотирасининг Ўзбекистон Республикаси интерактив харитаси” аппарат-дастурий мажмуасини хайрия қилиш бўйича шартнома имзоланди.
Ирода Бекмуродова
Самарқанд давлат университети
Ахборот хизмати ходими,
Шавкат Акрамов олган суратлар.
