Самарқанд давлат университети спорт фаолияти ва санъат факультетида мазкур спорт тури яхши тараққий этган бўлиб, кўплаб чемпионлар етишиб чиққанининг гувоҳи бўлганмиз.
Самарқанд давлат университети докторанти Марат Муҳаммадиев «Бадминтончиларни тайёрлашнинг бошланғич босқичида координацион қобилиятларни ривожлантириш» мавзусида илмий тадқиқот олиб бормоқда. Шунингдек, у Ўзбекистон Бадминтон федерацияси Самарқанд вилояти бўлими ижрочи директори вазифасида ҳам самарали фаолият олиб бормоқда.
Бадминтон спортининг тарихий шаклланиши ва бугунги кунда мамлакатимизда унинг ривожланиши ҳақида маълумотлар жуда кам. Шунингдек, бадминтончиларда координатсион қобилиятларни ривожлантириш борасида тадқиқотларнинг мавжуд эмаслиги ушбу мавзунинг долзарблигини кўрсатади.
Марат Муҳаммадиев мавзу доирасида спорт мактаблари ўқувчилари ўртасида анкета-сўровномаларини ўтказиб, мазкур спорт ёшларни қай даражада қизиқтириши юзасидан дастлабки маълумотларни қўлга киритган. Унга кўра, ёшларнинг кўпчилиги бадминтон спорт турига қизиқиши юқори эканлигини билдирган.
- Бадминтон спортчидан фақатгина ҳаракатни эмас, балки мантиқий фикрлашни, вазиятни олдиндан кўра билишни ҳам талаб қилади, - дейди Марат Муҳаммадиев. - Шунинг учун, биз ёшларни тайёрлашда кўпроқ уларнинг сезгирлиги, мантиқий хулоса қилиш қобилиятларини ривожлантиришга ҳаракат қиламиз. Шунингдек, ёшлар билан кўпроқ чаққонлик, эгилувчанликни яхшилаш кўникмалари устида кўпроқ шуғулланамиз. Бу спорт нафақат профессионаллар учун, балки ҳаваскорлар учун ҳам жуда фойдали. Хусусан у кўриш қобилиятининг яхшиланишига жуда катта ёрдам беради, жисмоний тетиклини таъминлайди.
Самарқанд давлат университети
Ахборот хизмати.
