Бугунги кунда бутун дунёда, кузатиладиган энг хавфли бахтсиз ҳодисалардан бири метаннинг портлашидир. Одатда метаннинг портлаши унинг ҳаводаги консентрациясини 5 фоиздан 16 фоизгача бўлган оралиғида кузатилади. Республикамизда газ қазиб олиш ва унинг истеъмолини ошиши билан атмосфера ҳавоси таркибидан метанни аниқловчи ускуналар ва сенсорлар яратиш долзарб муаммога айланиб бормоқда.
Самарқанд давлат университети кимё факультети магистри Йўлдош Эрданов зол-гел технологияси асосида газни аниқловчи сенсор яратиш устида тадқиқот олиб бормоқда.
- Саноати ривожланган мамлакатларда кимёвий газ сенсорлар яратиш соҳасидаги тадқиқотларнинг таҳлили термокаталитик ва яримўтказгичли сенсорлардан фойдаланиш табиий газни экспресс аниқлаш ҳисобига портлаш хавфининг олдини олишда энг ишончли ва қулай восита эканлигини кўрсатди, - дейди СамДУ магистри Йўлдош Эрданов. – Шу асосдан келиб чиққан ҳолда, биз рух (Zn) ва кобальт (Co) оксидлари асосида юпқа газ сезгир-плёнка олиш схемасини яратдик. Эритманинг барқарорлиги ва гидролизланувчи компонентлари таркибига кирувчи допантларнинг эрувчанлигини ҳисобга олган ҳолда, рух ва кобальт оксидлари асосида газ сезгир плёнкалар синтезида эритувчи сифатида этанолдан фойдаланишни таклиф этдик. Ушбу консентрациянинг кенг оралиғида плёнка ҳосил қилувчи эритманинг компонентлари таркиби ва нисбатининг золни етилиш жараёнига таъсирини ўргандик.
Таркиби - TEOS:H2O:этанол: HCl: =1:20:30:0,1 га мос келувчи эритманинг барқарорлиги энг юқори бўлиши аниқладик.
Натижада Зол-гел технологияси асосида газ сезгир материалларини олдик ҳамда улардан CH4 ни аниқловчи селектив сенсорлар яратдик. Тайёрланган сенсорлар тезкор ва юқори сезгир бўлиб, атмосферадаги CH4нинг юқори консентрацияларини аниқлашда қўлланилиши мумкин.
Самарқанд давлат университети
Ахборот хизмати.
