Жаҳон миқёсида ҳар томонлама ривожланган ёшларни тарбиялаш, ёш авлоднинг интеллектуал салоҳиятини рўёбга чиқариш бугунги куннинг долзарб масалалардан бўлиб, уларни ҳал этишда оила, мактаб ва маҳалла ҳамкорлиги муҳим аҳамият касб этади. Халқаро тажрибалар аҳолининг оилада фарзанд тарбиясига оид билимларини кенгайтириш, таълим муассасалари ролини ошириш, тарбия усулларининг энг муқобилини танлаш, оила ва мактаб ҳамкорлигини кучайтириш долзарб муаммо эканлигини кўрсатмоқда. Шу муносабат билан бошланғич таълимда оила ва мактаб ҳамкорлигининг янги механизмларини ишлаб чиқиш, оилада фарзанд тарбиясини маданий-тарихий анъаналар, урф-одатлар ҳамда умуминсоний қадриятларга таянган ҳолда ташкил этиш, тарбия жараёнини инсонпарварлаштиришга қаратилган илмий тадқиқот ишлари олиб борилмоқда.
Самарқанд давлат университети мактабгача ва бошланғич таълим факультети магистри Зарина Маматова “Замонавий бошланғич таълим шароитида оила ва мактаб ҳамкорлигининг ўзаро таъсирини моделлаштириш” мавзусида илмий тадқиқот олиб боради. Илмий раҳбари педагогика фанлари номзоди, профессор Кибриё Ҳасанова.
-Замонавий бошланғич таълим шароитида мактаб, оила ва маҳалла ҳамкорлигининг ўзаро таъсирининг назарий асосларини ўрганиш ишлари асосида, бугунги таълим тизимидаги ўзгаришлар ва таълим консепсиясига мос ҳолда,таълим ва тарбияни оиладан бошлаш зарурлигини кўрсатди, - дейди тадқиқотчи Зарина Маматова. - Текширувлар давомида замонавий бошланғич таълим ўқувчиларини тарбиялашда мактаб, оила ва маҳалла ҳамкорлик технологияларига сезиларли таъсир этувчи омилларни тизимли таҳлил этиш лозимлигини аниқладик. Илмий таҳлил ва кузатувлардан келиб чиқиб шуни айтиш мумкинки, замонавий бошланғич таълимда мактаб, оила ва маҳалла ҳамкорлик технологияларини бошқариш стратегияларини белгилаш, таълимни модернизациялаш шароитида маънавий тафаккурни тарбиялаш мазмуни ва сифатига қўйиладиган ДТС талаблари асосида янги моделни ишлаб чиқиш самарали ёндашувлардандир. Бу борада мактаб, оила ва маҳалла ҳамкорлик технологияларининг бугунги кун талабларга мос бўлиши, барча таълим муассасаларида ота-оналар ва ўқитувчиларнинг ҳамкорлик модели яратилиши лозим.
