Мартабали меҳмонларни Самарқанд давлат университети ректори, профессор, Олий Мажлис Сенати аъзоси Рустам Холмуродов қабул қилди.
Ташрифдан асосий мақсад халқаро ҳамкорлик алоқаларини йўлга қўйиш, магистратура ва докторантура ихтисослиги бўйича қўшма таълим дастурларини амалга оширишдир.
- Жанубий Кореянинг Донг-А университети 1946 йилда ташкил топган. Мазкур университетда 58 факультет мавжуд бўлиб, йигирма минг талаба таҳсил олади, дейди, - профессор Ҳаэ Воо Леэ. – Донг-А университети технология, аниқ, гуманитар, либерал фанлар, археология, муҳандислик, тиббиёт, спорт, инсон ресурсларини бошқариш, молекуляр биология, ИТ, соҳасига йўналтирилган бўлиб, асосан магистратура ва докторантура ихтисослиги бўйича кадрлар тайёрлайди. Бугунги ташрифимиз ҳар иккала университет учун ҳам манфаатли бўлишига ишонаман. Самарқанд давлат университети билан доимий ҳамкорлик алоқаларини йўлга қўйишни асосий мақсад қилганмиз. СамДУ маъмурияти юқоридаги йўналишлар бўйича магистратура, докторантурада ўқиш истагида бўлганларни тавсия қилса, амалий ҳамкорликка тайёрмиз…
Самарқанд давлат университети тарих факультети декани, профессор Дилфуза Жўрақулова томонидан археология соҳасида ҳам ҳамкорликни амалга ошириш, профессор-ўқитувчилар алмашинувини йўлга қўйиш таклифи илгари сурилди. Шунингдек, Кореяда олиб бориладиган археолгик қазишмаларда Самарқанд давлат университетининг археологлари иштирок этиши ҳамда соҳага оид дарслик ва адабиётлар алмашинуви кераклиги таъкидланди. Бунга жавобан, профессор Hae Woo Lee Донг-А университети археологлари Кореянинг энг яхши соҳа мутахассислари деб эътироф этилганлигини ва бу таклифни амалга ошириш бўйича шартнома тузилишини билдирди.
Тадбир якунида меҳмонлар Самарқанд давлат университети халқаро таълим дастурлари факультетидаги 2+2 таълим дастури бўйича ўқишини Кореяга давом эттирадиган талабалар билан суҳбатлашиб, Корея маданият маркази билан танишди. Шунингдек, ҳамкорлик меморандуми имзоланди.
Беҳруз ШАМСИДДИНОВ
Самарқанд давлат университети
Ахборот хизмати ходими,
Шавкат АКРАМОВ олган суратлар.
