Навоий вилояти Хатирчи тумани “Новжа” МФЙда яшовчи Нуриддин Примов 2020 йилда 13 миллион сўмга кредит эвазига олган мотокультиватори бир ой ҳам ишламасдан бузилиб қолди.
Ўша вақтда ер ҳайдаш мавсуми бўлгани боис, ускунадан тезроқ даромад олишни режалаштирган фуқаро уни “Дамариқ” МФЙда фаолият кўрсатувчи уста – “ЯТТ Қодиров Дилшод Маҳмудович”га ўзаро оғзаки келишув асосида таъмирлашга топширади ва бунинг учун олдиндан 500 минг сўм пул беради.
Ускунани бир ҳафтада таъмирлашга ваъда берган уста ҳафталар, ойлар ўтсада сўзининг устидан чиқмайди. Мотокультиваторни олиб кетишга келган фуқаро ускунаси ўрнида бир уюм эҳтиёт қисмларни кўради ва бу ҳолат юзасидан масъул идораларга мурожаат қилсада ҳеч қандай натижага эриша олмай сарсон-саргардон бўлади.
Ниҳоят Н.Примов Ўзбекистон Истеъмолчилар ҳуқуқларини ҳимоя қилиш жамиятлари федерациясининг Хатирчи тумани бўлимига шикоят аризаси билан мурожаат қилади.
Федерациянинг туман жамияти масъул ходимлари ушбу мурожаатни маҳалла фаоллари, устахона жойлашган “Бек Сардор Хатирчи” корхонаси раҳбарияти иштирокида ўрганиб, уста Д.Қодировга “Истеъмолчиларнинг ҳуқуқларини ҳимоя қилиш тўғрисида”ги қонун, истеъмолчига савдо ва хизмат кўрсатилишида истеъмолчининг ҳақ-ҳуқуқлари бўйича аниқ тушунтиришлар берилди.
Қонунни ва вазиятни тўғри англаган уста мотокультиваторни янги эҳтиёт қисмлар билан жиҳозлаб, эгасига топширди. Шундай қилиб фуқаронинг 13 миллион сўмлик мулки қайтарилди. [code][/code]
