Самарқанд давлат университети Венгрия қишлоқ хўжалиги ва табиий фанлар университети билан ҳамкорлик ўрнатди

- Ўзбекистон ва Венгрия ўртасида тобора ривожланаётган бугунги муносабатда олий таълим муассасалари ҳамкорлиги алоҳида ўрин тутади, - дейди Венгрия қишлоқ хўжалиги ва табиий фанлар университети (МАТE) ректори Чаба Дьюрич, - Мазкур таълим муассасаси аграр соҳада эртанги кун учун мутахассислар тайёрлайди ва барқарор ривожланиш, юқори сифатга эришиш мақсадида қишлоқ хўжалиги, атроф-муҳит муҳофазаси, табиий ландшафт, озиқ-овқат хавфсизлиги, жумладан, сув хўжалиги ва қайта тикланадиган энергиядан фойдаланиш тизимини бошқариш каби йўналишларда илмий-академик ҳамкорликка тайёр. Бугунги кунда университетимиз дунёнинг 60 дан зиёд давлати билан манфаатли ҳамкорликни йўлга қўйган. Самарқанд давлат университетига ташрифимиз чоғида ҳам бир қатор амалий таклифлар бўйича фикр алмашдик. Ўйлайманки, СамДУ билан шериклик долзарб мавзуларда халқаро аҳамиятга молик тадқиқот олиб бориш, илм-фан оламида янги уфқ очадиган кашфиёт ва янгиликлар яратиш учун самарали восита бўлади. Муносабатларимиз хавфсиз ва барқарор келажак учун пойдевор бўлиб хизмат қилиши, шубҳасиз. Венгрия қишлоқ хўжалиги ва табиий фанлар университети ушбу пойдеворнинг бир “ғишти”ни қўяётганидан мамнун.



Туркий давлатлар ташкилоти саммити доирасида Ўзбекистонга ташриф буюрган Венгрия қишлоқ хўжалиги ва табиий фанлар университети (МАТE) ректори, профессор Чаба Дьюричнинг Самарқанд давлат университетига ташрифи доирасида шу каби муҳим масалаларга қаратилган амалий таклифлар асосида муҳим келишувлар имзоланди.


Мартабали меҳмонларни СамДУ ректори, Ўзбекистон Республикаси фан арбоби Рустам Холмуродов кутиб олди. Музокара давомида икки томон учун ҳам муҳим бўлган соҳалар - қишлоқ хўжалиги, агробиотехнология, озиқ-овқат хавфсизлиги, жумладан, боғдорчилик ва сабзавотчилик, экология ва иқлим ўзгариши муаммолари каби йўналишларда шерикликни кенгайтириш, кенг миқёсда тажриба алмашиш мақсадида илмий алмашинув лойиҳаларини амалга ошириш масалалари муҳокама қилинди.


- Ўтган йили СамДУда ўтказилган Ўзбекистон-Венгрия ректорлар форумидан сўнг ушбу мамлакатнинг қатор нуфузли олий ўқув юртлари билан ҳамкорлик ўрнатдик, - дейди Р.Холмуродов, - Ўтган давр мобайнида ҳамкорлигимиз доирасида тадқиқотчиларимиз Венгрия университетларига ўқиш ва стажировка учун юборилди. Айни пайт улар муайян йўналишлар бўйича маҳаллий олимлар билан бирга тадқиқот олиб боришмоқда.


Бу галги ташриф икки мамлакат ўртасида илм-фан ва таълим соҳасидаги мустаҳкам ҳамкорликни барча истиқболли соҳаларда янада самарали йўлга қўйишга хизмат қилади. Келгусидаги мақсадимиз аниқ ва табиий фанлар, қишлоқ хўжалиги, озиқ-овқат хавфсизлиги, ахборот технологиялари каби муҳим йўналишларда етук кадрлар тайёрлаш, умумий муаммоларни биргаликда бартараф этиш йўлида тадқиқот олиб боришдан иборат.