Марҳамат туман адлия бўлимига туман тиббиёт бирлашмаси оналик ва болаликни муҳофаза қилиш ишлари бўйича бошлиқ ўринбосари М.Мирзалиев шикоят билан мурожаат қилган.
У Марҳамат туман санитария эпидемиологик осойишталик ва жамоат саломатлиги бўлими ходимлари томонидан текширув ўтказилиб, жарима жазоси қўлланилганлигини маълум қилган.
Ўрганиш давомида, Марҳамат туман санитария эпидемиологик осойишталик ва жамоат саломатлиги бўлими бошлиғи У.Тошмирзаев томонидан 2022 йил 18 октябрь куни туман туғруқ комплексида 2022 йил 18-22 октябрь кунлари ялпи текшириш ўтказиш ҳақида туман адлия бўлими юридик хизмат кўрсатиш маркази билан келишилмаган ҳолда буйруқ чиқарилганлиги, мазкур буйруқ асосидаги ишчи гуруҳ томонидан туман туғруқ комплексида 18 октябрь куни текшириш ўтказилганлиги, текшириш якуни бўйича санитария талаблари бузилганлиги юзасидан далолатнома тузилганлиги ва туғруқ комплекси раҳбари Н.Каримовага нисбатан 2022 йил 25 октябрь куни 1.500.000 сўм миқдорида маъмурий жарима қўллаш ҳақида қарор чиқарилганлиги маълум бўлди.
Ваҳоланки, Ўзбекистон Республикаси Президентининг 2021 йил 29 июндаги ПҚ-5168-сон Қарори билан тасдиқланган «Юридик хизмат кўрсатиш марказлари тўғрисида»ги Низомнинг 12-бандида «юридик хизмат кўрсатиладиган ташкилотлар томонидан Марказлар билан келишилмаган ҳолда қабул қилинган буйруқлар, фармойишлар, шартномалар ва юридик тусдаги бошқа ҳужжатлар ҳақиқий эмас деб топиш учун асос ҳисобланади» деб кўрсатилган.
Ўрганиш якунига кўра, туман адлия бўлими томонидан вилоят санитария-эпидемиологик осойишталик ва жамоат саломатлиги хизмати бошқармасига тақдимнома киритиш орқали қонунга зид маъмурий қарор бекор қилиниб, мурожаат муаллифининг бузилган ҳуқуқлари тикланди.
