Мартабали меҳмонлар дастлаб СамДУ археология, зоология музейлари янгидан ташкил этилган Биокимё институти билан танишгандан сўнг Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов билан учрашди.
Мулоқотда халқаро ҳамкорлик масалалари муҳокама этилди. Томонлар ўртасида узумчилик ва ғалланинг янги навларини яратиш бўйича илмий лаборатория ҳамда қўшма магистратура йўналишларини ташкил этишга келишилди. Археология, ландшафт дизайни, энергетика соҳаларида ҳамкорлик қилиш бўйича фикр алмашилди.
Шунингдек, озиқ-овқат илмлари, «Эрасмус+» дастури бўйича қўшма лойиҳалар ишлаш, талабалар алмашинувини йўлга қўйишга алоҳида эътибор қаратилди. Италиялик талабалар Самарқанд давлат университетига археология йўналишида тажриба алмашишга келиши учун шартномалар имзоланадиган бўлди.
- Самарқандга илк бор келишим. Самарқанд давлат университетининг фаолиятини кўриб қувондим, - дейди делегация раҳбари Стефано Убертини. – Бир қатор илмий лабораториялар ва ҳашаматли биноларнинг қад ростлагани Самарқанд давлат университетинг илмий салоҳияти ва юқори нуфузга эгалигидан далолатдир. Биокимё институтидаги оранжерая, археология ва зоология музейларидаги ноёб экспонатларнинг мавжудлиги мени ҳайратга солди… Европанинг энг йирик еттита илмий тадқиқот институтларидан бири Тушиа университетида жойлашган. Асосан, қишлоқ ва ўрмон хўжалиги, озиқ-овқат, биотехнологиялар, архитектура, чиқиндиларни қайта ишлаш, тарих, инсон ҳуқуқларини ҳимоя қилиш йўналишлари бўйича катта тажрибага эга… Самарқанд давлат университети билан ҳамкорлигимиз манфаатли бўлишига ишонаман.
Самарқанд давлат университети
Ахборот хизмати,
Шавкат АКРАМОВ олган суратлар
