Мазкур бинонинг очилиш маросимида Самарқанд давлат университети ректори, Ўзбекистон Республикаси фан арбоби Рустам Холмуродов, Ургут тумани ҳокимининг ёшлар сиёсати, ижтимоий ривожлантириш ва маънавий-марифий ишлар бўйича ўринбосари Муҳиддин Холиқов, туман «Нуронийлар» жамоат кенгаши раиси Фармон Азизов ва ота-оналар вакиллари иштирок этди.
Турар жой биносининг рамзий ленталари қирқилди. Йиғилганлар бинодаги шарт-шароитлар билан яқиндан танишди.
- Самарқанд давлат университети Ургут филиалининг 3-босқич талабасиман, - дейди сурхондарёлик талаба Феруза Низомова. - Давлатимиз томонидан бизнинг ўқишимиз учун барча шароитлар яратиб берилган. Филиалимизда фақат ётоқхонага эҳтиёж бор эди. Бугун талабаларнинг орзуси ушлади. Замонавий ва шинам хоналарга эга турар жой қад ростлади. Барча талабалар бундан хурсанд. Эндиликда менга ўхшаб бошқа вилоятдан ёки узоқ ҳудуддан қатнайдиган талабалар учун анча қулай бўлди.
Фармон Азизов, Ургут туман «Нуронийлар» жамоат кенгаши раиси:
- Бундан икки йил олдин туманимизда Самарқанд давлат университети Ургут филиалининг ташкил этилиши тарихий воқеа бўлган эди. Мазкур олий таълим муассасида 1500 нафар талаба таҳсил олмоқда. Бугун Ургутликлар учун катта тантана. Йигит-қизларимиз учун барча қулайликларга эга бўлган янги турар жой мажмуини кўриб, болаларимизга ҳавас қилдим. Айрим хонадонларда йўқ шароит, ушбу турар жойда бор. Кун сайин филиал ҳудуди кенгайиб бормоқда. Бу каби қурилишлар ва бунёдкорлик ишлари ҳали давом этишига, талабаларимиз учун янада яхшироқ имкониятлар яратилишига ишонаман.
Тадбир давомида яшил макон лойиҳаси доирасида бир қатор мевали кўчатлар экилди.
samarqandim.uz сайтидан олинди
