Тошкент шаҳар ҳокими Жаҳонгир Ортиқхўжаев AlterEgo лойиҳасига берган интервьюсида ўз фаолияти давомида бир аёл билан юз берган воқеани эслади.
"Президентимиз доим халқ билан мулоқот қилиш кераклигини таъкидлайдилар. Тўғри, одамлар билан гаплашиш қийин. Лекин улар билан суҳбатлашиш менга ёқади. Чунки мен уларнинг дардига қулоқ тутар эканман, муаммоларини ҳал қилиб бераман. Муаммосига ечим топилган одамнинг эса ҳаётида ва кайфиятида ўзгариш бўлади.
Фурсатдан фойдаланиб, халқ билан ўтказиладиган мана шундай учрашувларга бизнесменларни ҳам таклиф этган бўлардим. Бадавлат бизнесменлар келсин, ёнимда ўтирсин ва шунчаки тингласин: одамлар қандай яшаётганини билсин!
Халқ қабулларида қизиқ воқеалар ҳам бўлиб туради. Бир куни менинг олдимга бир аёл келди. Квартира беришимни сўради. Айтишича, шаҳар ҳокимлиги унга бепул уй бериши керак экан. Мен фақат ногиронларга ва ҳаддан ташқари кам таъминланган оилаларга навбат асосида уй берилишини айтдим. “Сиз ногирон эмассизку, моддий ҳолатингиз ҳам яхши”, дедим. Бепул уйлар биринчи навбатда ногиронларга берилишини тушунтирдим.
Тахминан бир ҳафта ўтгандан кейин яна ҳокимликка келиб, қабулхонага телефон қилди. Бақириб-чақириб, мени қабул қилишимни талаб қилди. Мен уни хонамга киритдим. Маълум бўлишича, ўтган сафар гаплашганимиздан кейин у уйига бориб, қўлининг иккита бармоғини кесибди. Қўли бинт билан боғланган. Менга қараб: “Мана, мен ногиронман. Мен энди ишлай олмайман. Менга уй беринглар!” деди" - дея ҳикоя қилди ҳоким.
