Кеча АОКАда Ёшлар иттифоқи ва Бош прокуратура вакиллари иштирокида матбуот анжумани бўлиб ўтди. Бу ҳақда агентлик матбуот хизмати хабар қилди.
Унда журналист Ёшлар иттифоқи вакилига савол билан мурожаат қилди.
“Деворга расм чизиш, плакатга расм чизиш, баён ёзиш каби тадбирлар билан чекланяпсизлар. Ёшлар Иттифоқи ташкил этилаётганда унга ёшлар масалалари бўйича жуда катта ваколатлар берилган эди. Нима деб ўйлайсиз, коррупцияга қарши курашишда тадбирларингизнинг сифати, самарадорлиги эскириб қолмадими? Қачонгача деворга расм чизиш, асфалтга расм чизишлар билан чекланасизлар?”
“Ёшлар иттифоқи асосан жамоат ташкилоти ҳисобланади, — деди Иттифоқ вакили Акмал Алимов. — Бизнинг асосий ишимиз — тарғибот, тушунтириш, ёшларнинг ҳуқуқий саводхонлигини оширишдан иборат. Асфалтга, деворга ёки плакатга расм чизиш танловлари асосан мактаб ўқувчилари ўртасида ўтказилади. Фақат расм чизиш эмас, ҳуқуқий тарғибот тадбирлари, конференциялар ҳам ташкил этамиз. Бу йилдан он-лайн семинарлар ўтказиш йўлга қўйилди, бунда ҳар бир соҳанинг мутахссислари иштирокида видеоселектор тарзида ёшларга маърузалар ўқиб берилади”.
