Аввал хабар қилинганидек Қаҳрамон Қуранбаев Ёшлар иттифоқи раиси лавозимидан озод этилди. Унинг ўрнига эса Алишер Саъдуллаев раис вазифасини вақтинча бажарувчи этиб тайинланди. Лавозимдан кетгандан сўнг Қуробоев ўзининг фейсбукдаги расмий саҳифасида ёшларга мурожаат қилди. Қуйида мурожаат матнини ҳавола этамиз.
Қадрли ёшлар!
Ёшлар иттифоқидаги фаолиятим даврида ёшлар билан ишлашдан, улар билан бирга бўлганимдан чин дилдан хурсандман. Ўйланган ишларимизнинг баъзилари амалга ошди, бошқалари режаларда қолди.
Шу ўтган вақт ичида юртимиз ёшларининг қизиқишлари, хоҳиш ва истакларини инобатга олган ҳолда уларга янада қулай шароитлар яратиш, келажакка бўлган ишончларини янада ошириш мақсадида аҳил жамоамиз билан меҳнат қилдик.
Сизларга бўлган меҳримни изҳор қилган ҳолда сиз ёшларга муваффақият тилаб қоламан.
Ишончим комилки, Ўзбекистон ёшлар иттифоқи жамоаси ва юртимиз ёшлари Алишер Саъдуллаев бошчилигида янги марраларни забт этади, - деб ёзади Қаҳрамон Қуранбаев.
У Президентнинг 29 август куни имзолаган фармонга мувофиқ Ўзбекистон Республикаси Президентининг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчисининг биринчи ўринбосари лавозимига тайинланди.
