АҚШнинг Миллий хавфсизлик агентлиги собиқ ходими Эдуард Сноуден WhatsApp ва Telegramʼдан фойдаланиш хавфдан холи эмаслигини айтган. У “Агар сизда муқобил вариант бўлса, WhatsApp ёки Telegramʼдан фойдаланманг”, - деб айтиб, ҳар икки дастурдан кўра Signal ёки Wire мессенжерларидан фойдаланган маъқул эканлигини таъкидлаганди.
Буни қарангки, ушбу хабардан сўнг Ўзбекистонда Signal ва Wire мессенжерларини кўчириб олиш кескин кўпайган. Буни App Annie таҳлил сервиси маълумотларидан билиб олиш мумкин.
Хусусан, Signal бу борада 65, Wire эса 86-позицияга кўтарилган. Илгари бундай ўсиш кузатилмаган эди.
Маълумот учун, Signal 2014 йилда Мокси Марлинспайк ва у асос солган Open Whisper Systems (OWS) компанияси томонидан яратилган. Ушбу иловада OWS томонидан ишлаб чиқилган Signal Protocol муфассал шифрлаш алгоритмидан фойдаланилади. Бу алгоритм жуда машҳур бўлиб кетган ва бошқа мессенжерларга ҳам татбиқ этилган.
Унинг муаллифлари томонидан билдирилишича, хабарлар серверда эмас, балки юборувчининг қурилмасида шифрланади, шифрни очиш калити эса қабул қилиб олувчида бўлади. Шундай қилиб фақат уларгина маълумотларни ўқий олишади.
Wire эса Skypeʼнинг собиқ топ-менежерлари Жонатан Кристенсен, Янус Фриис, Приид Зильмар томонидан яратилган ва кучайтирилган ҳимояга эга мессенжерларнинг янги авлодидир. Ундаги шифрлаш тизимида ҳам OWS протоколи қўлланилади.
