2018 йилнинг 9 ойида Россиядан Ўзбекистонга келган сайёҳлар сони 30 фоизга ошганлиги ҳақида хабарлар тарқалган эди. Лекин АТОРнинг расмий маълумотида бундай ўсиш кузатилмаган, дея хабар қилмоқда Риа Новости.
Ўзбекистоннинг Россиядаги элчиси Ботиржон Асадов Новосибирскда мамлакатимизнинг сайёҳлик имкониятлари ҳақида тақдимот қилган. Унда элчи январь-сентябрь ойларида Ўзбекистонга Россиядан 350 минг сайёҳ келганини маълум қилди. Бир йил олдин айнан шу даврда бу кўрсаткич 270 минг кишини ташкил қилган.
Лекин манбанинг хабар беришича Асадов томонидан айтилган маълумот Россиядаги статистик маълумотларга тўғри келмаган. Россия Федерацияси ФХХ Чегара хизматининг маълумотига кўра 2018 йилнинг январь-сентябрь ойларида Россиядан Ўзбекистонга 128 808 киши ташриф буюрган, шуларнинг 27 158 нафари сайёҳлар бўлган (йиллик кўрсаткичдан 25,9 фоизга кўп).
“Ҳозирги пайтда Ўзбекистон реклама томондан ортда қолаётганлиги сабабли сайёҳлик йўналишида кўплаб туристлар учун номаълум давлат сифатида қолмоқда. Иккинчи томондан авиачипталар жуда қиммат. Россияда Ўзбекистонга чипталар нархи 18 минг рублдан бошланади, поездда ҳаракатланиш эса жуда узоқ вақтни қамраб олади ва ноқулай”, – дейди Россия миллий туроператори эксперти.
Туроператорларнинг маълумотига кўра, бугунги кунда Ўзбекистон сайёҳлар учун фақат экскурсион тур томонидан маълум холос. Сайёҳларни Ўзбекистонда бошқа дам олиш форматлари камроқ қизиқтиради, чунки улар ҳақида маълумот жуда кам, дейилади хабарда.
