Айни пайтда ИИВ матбуот котиби Шоҳрух Ғиёсов иштирокида брифинг бўлиб ўтмоқда. Унда матбуот котиби ҳудуддан ҳудудга ўтишдаги чекловлар ҳақида гапирди.
Ғиёсов "Агар бошқа вилоятда яшайдиган яқин қариндошларининг, масалан ота-онасининг дафн маросимига бориш зарур бўлса, қандай йўл тутиш керак?" мазмунидаги саволга қуйидагича жавоб берди.
"Афсуски, қанчалик оғир бўлмасин, ўрнатилган чеклов барчага истисносиз тааллуқли бўлиб, бошқа вилоятда бўлган яқин қариндошларингизнинг дафн маросимида қатнашолмайсиз" - деди матбуот котиби.
У шунингдек, оғир беморни бошқа вилоятга олиб бориб қўйиш масаласига ҳам тўхталиб ўтди.
"Агар Сиз оғир касал бўлган фуқарони, масалан Тошкент шаҳридан ўзининг доимий яшайдиган бошқа вилоятига олиб бормоқчи бўлсангиз, унинг хақиқатдан ўша вилоятда рўйҳатда турганлигини исботловчи паспорти ва соғлиқни сақлаш ходимларини тегишли хулосаси асосида постлардан олиб ўтишингиз ва уйига элтиб қўйишингиз мумкин.
Касални уйига олиб борган фуқаро, карантин чекловлари тугамагунча ортга қайтолмайди"- дея қўшимча қилди Ғиёсов.
