Соғлиқни сақлаш вазирлиги ижтимоий тармоқларда тарқалган видеога муносабат билдирди.
Маълум бўлишича, тармоқларда оддий пиёзни икки-учга бўлиб, деразалар олдига, шкафлар ичига, хуллас одам кирадиган жойларга қўйиб ташланса, бу ҳар қандай вирусни ўзига тортиб олиб, касаллик тарқалишининг олдини оларкан деган мазмундаги видеолавҳа тарқалган. Унда шунингдек, пиёз коронавирусни ўлдириши, шу сабабдан у қорайиб қолиши маълум қилинган. Вазирлик ушбу ҳолатга муносабат билдирди.
Вазирлик вакили Саидмурод Саидалиев ушбу хабарни сафсатадан ўзга нарса эмас эканлигини айтди.
Саидалиев пиёз организм учун фойдали маҳсулот эканини айтиб, унинг таркибида фитонцид моддалар мавжудлиги ва улар кўплаб бактерияларни ўлдириш хусусиятига эгалигини таъкидлади. Пиёзни бўлакларга бўлиб уйга сочиб чиқса вирус ўлади деган нарса илмий асосланмагани айтилди.
Пиёз ҳам кесиб қўйилса, ҳар қандай бошқа сабзавот сингари вақт ўтиб эскиради, қораяди ёки бошқа тусга киради. Бу асло вирусларга боғлиқ эмас.Юртдошларимизга интернетдаги “мутахассис”лардан эмас, бевосита соҳа вакилларидан маслаҳат олишни тавсия қилган бўлардим, – деди С. Саидалиев.
