Тошкентлик қиз бадавлат оилага турмушга чиқиб, отаси томонидан куёвга берилган "Спарк" автомашинаси сабаб ажрашишга мажбур бўлгани ҳақида "Репост" нашрига сўзлаб берди.
23 ёшли Марямга (исми ўзгартирилган) куёвни оиласи топиб берган. Куёвнинг оиласи жуда бадавлат яшаган. Уларнинг ўз бизнеси бор. Оиласининг танловидан ҳеч иккиланмаган қиз, Азизга турмушга чиқишга рози бўлган. Тўйдан сўнг қиз келин бўлиб тушган оилада "Куёв чақириқ" маросими ташкил этилган. Унга оиланинг энг яқинлари ва куёвнинг дўстлари таклиф этилган. Маросимда қизнинг отаси сўзга чиқиб, куёвга "Спарк" автомашинасининг калитини совға қилганда Азиз калитни олмаган ва маросимни тарк этган. Маросимдан сўнг Марям куёвга калитни берганда ҳам Азиз олмаган ва қайнотаси куёвни ҳамманинг олдида шарманда қилганини айтган. Куёв "Спарк" совға қилиш бу уят эканини айтиб, камида "иномарка" берилиши керак эканлигини билдирган. Шунда Марям жаҳл устида уйидан чиқиб кетган ва ота-онасининг олдига борган. Қиз ажрашишга ариза берган ва барчанинг ажрашмасликка даъват этишига қарамай у оиладан кетган. Ҳозир қиз ўқишини давом эттирмоқда.
Марям ҳозирда янги турмуш ҳақида ўйламаётганини, бошқаларга турмушга чиқишдан олдин яхшилаб ўйлаб олишни, бойликка учиб оила қурмасликни тавсия қилган.
