Жорий йил 12 апрель куни Наманган вилояти ҳокими Хайрулло Бозоров коронавируснинг тарқалиши, унинг олдини олиш бўйича қилиниши керак бўлган ишлар юзасидан аҳолига мурожаат қилди.
Ҳоким ўз мурожаатида коронавирус қандай ҳолатларда тарқалгани хусусида гапирди. Унинг айтишича, вилоятда ҳатто янги келин куёвлар ҳам ушбу вирусни юқтириб олган.
"Вилоятда карантин қоидаларини бузиш ҳолати бўйича жуда кўп қонунбузарликлар учрамоқда. Вилоятимизда касалликка чалинганларнинг касаллик варақасига қарайдиган бўлсак. Битта касалликка чалинган фуқароимиз 38 тагача бўлган фуқароларга юқтирганлиги, бошқа бир ҳолатда касалликка чалинган фуқаро 19 март куни тўй маросимига бориб, шу ерда 18 кишига ушбу касалликни юқтиргани. Энг ачинарлиси янги келин-куёвга ҳам мана шу касалликни юқтиргани, бугун фуқароларимизга мисол бўлмаяптими?", - дея савол билан мурожаат қилди ҳоким.
Шунингдек, вилоят ҳокими сўнгги уч кунда олтита бемор аниқланиб, улар касалликни қаерда юқтириб олганини билмаётганини таъкидлаган.
Эслатиб ўтамиз, 13 апрел соат 06:00 дан бошлаб вилоятнинг Наманган шаҳри ва Учқўрғон тумани, шу жумладан, Қайқи қишлоғи ҳудудида қатъий чекловлар жорий қилинади.
