Ўзбекистон “Меҳр-шафқат ва саломатлик” жамоат фондининг маълум қилишича Вашингтонда “Биз Ўзбекистонга бефарқ эмасмиз” фонди тузилди.
Ҳозирда фондга 150 кишидан 21 минг доллар йиғилган. Барча маблағ “Меҳр-шафқат ва саломатлик” жамоат фондига ўтказиб берилади.
“Мен фонд ҳақида эшитишим биланоқ барча маълумотларни олиб, Канаданинг Манитоба, Алберта, Британия Колумбия провинцияларида яшаётган ўзбекистонликларга етказишни бошладим. Шу куннинг ўзида ўзбек оилаларидан хайрия маблағлари келиб туша бошлади. Хусусан, Алберт провинциясининг Ред Диир шаҳрида яшовчи Расул Мажидовлар оиласи, Дилсора Фозилова ва бир гуруҳ ватандошларимиз бу ташаббусга қўшилди. Оилам, тиббиёт олийгоҳи талабалари бўлган фарзандларим ҳам бунга ўз ҳиссаларини қўшишди. Ҳозирга қадар тахминан 150 кишидан 21 000 $ миқдорида маблағ йиғилди. Бироқ,ҳали бу давом этади. Йиғилган маблағлар “Меҳр-шафқат ва саломатлик” жамоат фондига ўтказиб берилади”, – дейди асли ўзбекистонлик, Канадада коронавирусга қарши курашаётган шифокор Обидхон Мамадалиев.
“Меҳр-шафқат ва саломатлик” жамоат фонди фуқаролар томонидан фондга келиб тушаётган пул қаерга сарфланаётгани, шаффофлик тўғрисида кўплаб саволлар келиб тушаётганини маълум қилди. Фонднинг билдиришича, пуллар Соғлиқни сақлаш вазирлиги ва тегишли ташкилотлар томонидан доимий назорат қилинади. Қолаверса, фонднинг васийлик кенгаши аъзолари ҳам жамоатчилик назоратини ўрнатган. Шунингдек, оммавий ахборот воситалари, хусусан, Халқаро пресс клуб, Ўзбекистон 24 телерадиоканали, АОКА томонидан ўтказилаётган брифингларда, Коронавирус инфо расмий телеграм канали ҳамда етакчи сайтларда келиб тушган ва харажат қилинган маблағлар ҳақида кунлик маълумотлар бериб борилмоқда.
