Бугун, 15 апрель куни бўлиб ўтган брифингда Бош прокуратура Ички ишлар органларида қонунчилик ижроси устидан назорат бошқармаси бошлиғи Содиқжон Бердиалиев иштирок этди.
Брифингда Бердиалиев Тошкент шаҳрининг Юнусобод туманида коронавирусга чалинган бемор ҳақида гапирди. Бемор 19 мартдан 4 апрелга қадар 51-сонли оилавий поликлиника ва 7-сонли шаҳар клиник шифохонасига умумий ҳисобда 4 марта мурожаат қилган. У шу кунлар давомида иситмаси кўтарилиб, ҳолсиз юрган. Уни шифокорлар ҳар сафар муолажалар билан қўйиб юборган. Шундан сўнг аҳволи оғирлашиб бешинчи марта мурожаат қилгандагина ундан вирусологик текширув учун намуна олинган. Таҳлил натижасига кўра фуқарода коронавирус аниқланган.
Ҳозирда фуқаронинг ўзи ва у билан мулоқотда бўлган 30 нафар фуқаро карантинга олинган. Фуқаро билан мулоқотда бўлган ҳамшира ва бошқаларда коронавирус аниқланаётгани маълум қилинди.
