Ўзбекистонда айрим фаолият турларига рухсат берилди, дея хабар қилмоқда хабар.уз.
Маълум бўлишича, Инқирозга қарши курашиш республика комиссиясининг қарори қабул қилинган ва унга кўра айрим йўналиш бўйича фаолият олиб борувчиларга ўз ишини давом эттиришга рухсат берилган. Хусусан,
қурилиш материаллари бозорлари, шу жумладан, қурилиш материалларининг чакана ва улгуржи савдоси фаолияти билан шуғулланувчи хўжалик юритувчи субъектларга (майдони 500 кв.м дан кам бўлмаган);
йирик ишлаб чиқарувчи субъектларнинг ўз маҳсулотларини сотишга мўлжалланган ҳудудлардаги тармоқ дўкон (магазин)ларига (санитар нормаси 10 кв.м га 1 нафар харидор тартиби асосида);
ҳунарманд ва усталарга – улар томонидан ясалган буюмларни бозор расталаридан ташқари алоҳида жойлашган жойда (дўкон) сотиш фаолиятига;
уруғ ва кўчат етиштириш ҳамда уларни сотиш фаолияти билан шуғулланадиган тадбиркорлик субъектларига (мулкчилик шаклидан қатъий назар);
тижорат банкларининг объектлардаги шохобчаларига (кассалари);
автомобилларга эҳтиёт қисмлар сотиш фаолияти билан шуғулланадиган тадбиркорлик субъектларига (мулкчилик шаклидан қатъий назар);
автомобиллар, қишлоқ хўжалиги ва қурилиш техникаларига сервис хизмат кўрсатувчи ташкилотларга – 1000 кв.м дан кам бўлмаган майдонга эга субъектлар, шунингдек, вулканизация хизматлари кўрсатувчи субъектларга;
кимёвий тозалаш билан шуғулланувчи тадбиркорлик субъектларига;
нотариал идоралар ва суғурта компанияларини фаолият юритишига;
тўхтаб қолган инвестиция лойиҳалари ва ижтимоий соҳа объектларини қуриш ишларини давом эттиришига ижозат берилган.
Ушбу фаолият турлари ўз ишини санитария-эпидемология талабларига қатъий риоя қилган ҳолда амалга ошириш кераклиги ҳам белгилаб қўйилди.
