Бугун, 25 апрел куни Маҳалла ва оилани қўллаб-қувватлаш вазирлиги матбуот котиби Саодат Боймирзаева иштирокида брифинг бўлиб ўтди.
Унда карантин оилавий ажрашишларга сабаб бўлаяптими деган мазмундаги саволга жавоб берди.
Вазирлик вакилининг маълум қилишича йил бошидан бери оилавий ажрашишлар тузилган никоҳга нисбатан 15,8 фоизни ташкил этмоқда. Яъни, йил бошидан бери 49811 та никоҳ қайд этилган бўлса, 7857 та ажралиш ҳолати кузатилган. Бу ўтган йилнинг айни даврига нисбатан 162 тага ажрашиш камайгани демакдир, дейди вазирлик вакили.
"Карантин даврида оилавий келишмовчиликлар кўпайиб боряпти деган фикрлар нотўғри", - дейди Саодат Боймирзаева.
Аксинча, ушбу синовли кунлар сўнгги пайтларда йўқолиб бораётган меҳр-оқибат, ҳамжиҳатликни қайтаргани алоҳида таъкидланди.
Ўзбекистонда ажрашишга оилавий келишммовчиликлар, фарзандсизлик, бирга яшамаслик, хиёнат, миграция каби масалалар сабаб бўлаётгани қайд этилди. Ажрашиш энг кўп кузатиладиган ҳудудлар эса Тошкент шаҳри, Сирдарё, Навоий, Андижон ва Тошкент вилоятлари экани айтилди.
