Аввал хабар қилинганидек, бугун ИИВ Ахборот хизмати раҳбари Шоҳрух Ғиёсов иштирокида брифинг бўлиб ўтди. Унда вазирлик вакили фуқаролар томонидан берилган саволларга жавоб берди.
Хусусан, ҳунарманд ва автоэҳтиёт қисмлар дўконида ишлайдиганлар иш жойига шахсий автомобилида бора оладими деган мазмундаги саволга Ғиёсов "бўлади" дея жавоб берди.
"Бунинг учун маҳаллий ҳокимликка мурожаат қилиб, мурожаатингизда батафсил маълумотларни (устахона, дўкон жойлашган манзил, шахсий транспорт восита ва бошқаларни) кўрсатиш лозим.
Ҳокимлик мурожаатни ўрганиб чиқади, сўнг тегишли рухсатнома беради. Шундагина шахсий транспортдан фойдаланиш мумкин", - дея қўшимча қилди ИИВ вакили.
Шунингдек, Тошкентда яшаб Чирчиқда ишлайдиган фуқаро Чирчиқ ҳокимлигидан машинада ҳаракатланиш учун рухсатнома олгани, ушбу рухсатнома билан Тошкентда ҳаракатлана олиш ҳуқуқи борми ёки йўқ мазмунидаги савол ҳам берилди.
Ғиёсов фуқарога ҳаракатлана олишини айтиб, фақат ёнида меҳнат дафтарчаси нусхасини ҳамда иш жойидан берилган тегишли маълумотномани олиб юриши кераклигини айтди.
