Тармоқларда Сардобадаги сув омборидан талофат кўрганларга юборилган буюмларнинг ҳовлида аянчли аҳволда ётган сурати тарқалди. Сирдарё вилоят ҳокимлиги ушбу ҳолатга муносабат билдирди. Маълум бўлишича, сурат Гулистон шаҳри Н.Зокиров кўчаси 1-уйдаги омборхонада олинган. Буюмлар ҳақиқатдан ҳам ёрдам сифатида юборилгани маълум қилинди. Шу йил 13-14 май кунлари шаҳарда вақти-вақти билан ёмғир ёққан. Тарқалган суратдаги ҳолат эса ўша кунларда содир бўлган. Кўнгиллилар буюмларни олиб келишгандан сўнг уни саралаётган вақтда кучли ёмғир ёққан. Шундан сўнг улар омборхонадаги панароқ жойда ёмғир тинишини кутиб турган. Шу вақтда эса номаълум шахс ушбу ҳолатни суратга олган ва тарқатиб юборган.
Кейинчалик буюмлар сараланган ва дезинфекция қилингандан сўнг муҳтожларга етказилган. Ҳокимлик муносабатида сараланган буюмлар суратлари ҳам илова қилинган.
