Соғлиқни сақлаш вазирлиги 21 май санасида Ўзбекистонда жами 28 нафар фуқаро коронавирусга чилинганини маълум қилди.
Кун давомида соат 10:00 ҳолатига кўра 11 нафар, 16:30 ҳолатига кўра 14 нафар ва 23:00 ҳолатига кўра эса 3 нафар фуқарода, жами 28 нафар фуқарода коронавирус аниқланган. Янги қайд этилган 28 ҳолатдан 7 нафари ҳалқаро юк ташишга ихтисослашган автомашина ҳайдовчилари бўлса, 1 нафари хориждан келиб, карантинга олинган фуқаролар орасидан тасдиқланган. 20 ҳолатда эса касаллик аҳоли орасида аниқланган.
Хусусан, Тошкент шаҳрида 1 нафар коронавирусга чалинган фуқаро 12 кишига, Самарқанддаги 1 нафар фуқаро 3 кишига, Навоий вилоятида 1 нафар COVID-19 билан зарарланган фуқаро эса 5 кишига ушбу касалликни юқтирган. Яъни, Ўзбекистонда 21 май куни 3 нафар фуқаро 17 нафар оила аъзолари, яқинлари ва ҳамкасбларига ушбу касалликни юқтиришга сабабчи бўлган.
Вазирлик шу кунларда берилган баъзи эркинликни нотўғри тушиниб, фуқароларнинг заруратсиз, карантин қоидаларига амал қилмасдан кўчада юриши касалликнинг тарқалишига сабаб бўлаётганини алоҳида таъкидлади. Фуқаролардан карантин ва гигиена қоидаларига қатъий амал қилиш сўраб қолинган.
