Ўзбекистолник фуқаронинг маълум қилишича, у Украина давлатига даволангани бориб, пандемия сабаб парвозлар бекор бўлгани учун ўша ерда қолиб кетган. Қуйида фуқаронинг мурожаатини ҳавола этамиз (имло хатолари тўғирланган).
“Ассалому алайкум, Мен Сурхондарё вилояти, Сариосиё туманиданман. Соғлигимни тиклаш учун оилам, фарзандимни ташлаб, Украина давлатига шу йилнинг 16 январь куни келдим. Менга жигар “цирроз гепатит Б. Д” ташхиси қўйишди. Бир ой даволандим. Қайтишга билетим 16 мартга эди. Учишга қарийб 5-6 соат қолганида COVID-19 сабаб, парвоз бекор бўлди. 4 ойдан бери Украинадаман. Моддий аҳволим ҳам яхши эмас, амал-тақал қилиб кун ўтказяпман. Соғлигим ёмонлашяпти. Чунки даволаниш учун пулларни фақат озиқ-овқатга ишлатишга мажбурман. Хориждан чартер рейслар иккинчи марта қўйилди, лекин Украинагамас. Бу ерда менга осон бўлмаяпти. Фарзандим, оилам, яқинларимдан олисда, бемор ҳолатимда. Илтимос, Украинага ҳам чартер рейслар қўйинглар. Ҳурмат билан ватандошингиз бемор она”, – дейилади мурожаатда.
Сурхондарёлик аёлнинг маълум қилишича, у ерда яна юзлаб фуқаролар Ўзбекистонга қайта олмаяпти.
Эслатиб ўтамиз, аввалроқ Ўзбекистон ҳукумати коронавирус тарқалиши хавфи туфайли 16 март санасидан бошқа мамлакатлар билан транспорт ҳаракатини тўхтатган эди.
