Мўйноқлик ёшлар оғир чўл шароитида ҳам иссиқхонадан даромад олмоқда

Мўйноқлик ёшлар оғир чўл шароитида ҳам иссиқхонадан даромад олмоқда
Бошида кўпчилик ишонмади. Ахир Мўйноқнинг ёзда олов пуркайдиган жазирамаси-ю қишда бадан-баданингни сирқиратадиган изғиринида, камига бадар кетган Оролдан мерос шўрхок тупроғида замонавий иссиқхона барпо қилиб, ҳосил олиш қай бир маънода эртакка ўхшаброқ кетади. Аммо бугунги ислоҳотлар амалий ишларга, ҳаётий натижаларга асослангани боис ҳам мўйноқлик ёшлар саҳрода ишлаб, даромад топишни уддалашди.

Фавқулодда вазиятлар вазирлиги, Қорақалпоғистондаги Халқ қабулхоналари, секторлар раҳбарлари кўзи ёниб турган бу йигит-қизларнинг эзгу орзуларига камарбаста бўлмоқда. Ёшларни қўллаб-қувватлашга оид давлат сиёсатининг ёрқин ҳаётий ифодаси – беш ой нари-берисида Қипчоқдарё овулида қурилган 1 гектардан зиёд иссиқхонада бугун етиштирилаётган қишлоқ хўжалиги маҳсулотлари овозаси эса бутун Оролбўйи бўйлаб таралмоқда. Шу боис саҳро қўйнидаги бу иссиқхонани ўз кўзи билан кўриш учун атай Мўйноққа келадиган ёшлар сафи кенгаймоқда.

Мўйноқлик ёшлар оғир чўл шароитида ҳам иссиқхонадан даромад олмоқда

Бу гал тажриба алмашиш учун Нукус шаҳридан келган ёшлар Мўйноқдаги тенгдошларининг чўл ичидаги шу иссиқхонадан йигирма кунда 36 тонна бодринг узиб, сотишга эришганини эшитиб, икки карра ҳайратланишди. Демак, ишласа, изланса, уддалаш мумкин экан. Ҳадемай улар помидор сотишни бошлашади. Бир бўлак майдонда ҳавасга экилган булғор қалампири-ю бақлажон ҳам униб, ҳосил берди.
Яна бир ибратли жиҳат – Мўйноқ ёшлари ўз қўллари билан етиштирган сабзавот маҳсулотлари билан “Саховат ва кўмак” умумхалқ ҳаракатига ҳам ҳисса қўшишга улгуришди. Куни кеча Мўйноқнинг Таллиўзак, Дўстлик, Мадели, Қозоқдарё, Учсой каби 11 та овулидаги ижтимоий ҳимояга муҳтож 200 дан ортиқ оилага етказиб берилган навбатдаги эзгулик карвонида 13 турдаги озиқ-овқат маҳсулотлари қаторига Қипчоқдарё овулидаги иссиқхонадан янги узилган сабзавотлар ҳам қўшилди.


Албатта, булар – мўйноқлик ёшларни доимий ишли ва тадбиркор қилиш йўлидаги илк қадамлар. Ҳали олдинда бажариладиган вазифалар кўп. Ёшлар билан навбатдаги мулоқотда ҳам неча йилдан бери ўз деҳқонини кутиб ётган Мўйноқ тупроғидан, ерости сувларидан унумли фойдаланиб, янги-янги далалар, ихчам иссиқхоналар барпо қилишга келишиб олинди. Эрта-индин Қипчоқдарё овулидаги 10 та ёш оиланинг ҳовлисида ёки ҳовли этагидаги бўш майдонларда ҳар бири 10 сотихли 10 та замонавий иссиқхона қурилиши учун грант маблағи ажратиладиган бўлди. Илк ҳисоб-китобларга кўра, 10 сотихли иссиқхонадан ойига камида 8-10 миллион сўм даромад топиш мумкин.

Ўхшаш янгиликлар

Янгиликка фикр ёзиш чоп этилган кундан 30 кун ичида мумкин.

Сўнгги янгиликлар

Самарқанд давлат университетида Наврўз сайллари

Самарқанд давлат университетида Наврўз тантаналари эрта тонгдан бошланиб, байрам сайлларига уланиб кетди. Миллий куй-қўшиқлар, бетакрор...
20-03-2024, 10:14

Самарқанд давлат университетида “ХХI аср психологияси: муаммолар, ютуқлар, инновациялар” мавзусида халқаро конференция ўтказилди…

Халқаро психология фанлари академияси билан ҳамкорликда ўтказилган анжуманда Россия, Қозоғистон, Белоруссия, Озарбайжон давлатларидан 30 га...
16-03-2024, 08:15

Россиялик машҳур физик олим Самарқанд давлат университетида бўлди…

Самарқанд давлат университетига Россия Фанлар академиясининг академиги Владислав Хомич ташриф буюрди. Машҳур физик олим билан Самарқанд...
15-03-2024, 08:13

Самарқанд давлат университети Италиянинг Саленто университети билан ҳамкорлик қилади

Самарқанд давлат университетига Италиянинг Саленто университети ректори Фабио Поллисе бошчилигидаги делегация ташриф буюрди. Мартабали...
14-03-2024, 08:11

Ҳиндистонлик профессор Самарқанд давлат университетида фаолият кўрсатмоқда…

Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов ҳиндистонлик...
10-03-2024, 08:09
Ўзбекистон янгиликлари » Жамият » Мўйноқлик ёшлар оғир чўл шароитида ҳам иссиқхонадан даромад олмоқда