Соғлиқни сақлаш вазирлиги ҳавотирли вазият ҳақида маълум қилди. Вазирликнинг таъкидлашича, Ўзбекистоннинг айрим ҳудудларидаги маҳалла ҳамда туманларда коронавирусга чалинганлар гуруҳ-гуруҳ бўлиб чиқаётгани вазиятнинг хавотирли эканини кўрсатяпти.
Шундан келиб чиқиб, вазирлик одамлардан бир жойга тўпланишдан, турли тадбирларни ўтказишдан вақтинча тийилиб туришни сўрамоқда.
ССВ кеча, 19 июнда мамлакатимизда касаллик қайд этилган ҳолатнинг 29 нафари аҳоли орасида тасдиқланганини маълум қилиб, қуйидаги ҳолларда аниқланганини билдирди.
Хусусан, Чилонзордаги дўконда савдо қилувчи, асли Сергелида яшовчи фуқарода, Мирзо Улуғбек туманида яшовчи фуқаро ва унинг икки нафар фарзандида, Тошкентда бўлиб турган асли бухорлик шахсда, Учтепада 3 нафар пенсионерда, Юнусободда бир оиланинг 6 нафар аъзосида касаллик қайд этилган.
Шунингдек, Наманганнинг Поп тумани Ғурумсарой МФЙда яшовчи 3 нафар фуқарода, Тошкент вилояти Чирчиқ шаҳар ҳокимлиги сектори иш юритувчисида, Ўртачирчиқ туман туғруқ бўлимидаги беморда ҳам коронавирус инфекцияси тасдиқланган.
Вазирликнинг маълум қилишча, ушбу касаллик аниқланган фуқароларнинг аксарияти тана ҳарорати кўтарилгач, шифохонага мурожаат қилишган ва намуна топширишган. Айни пайтда мазкур ҳолатлар юзасидан эпидемиологик суриштирув ишлари олиб борилмоқда.