Хабар қилганимиздек 10 июлдан 1 августга қадар, яъни 20 кун Ўзбекистонда карантин чоралари кучайтирилади. Бунда бир қатор чекловлар жорий этилади.
Коронавирусга қарши кураш штаби аъзоси, профессор Ҳабибулла Оқиловнинг айтишича, мутахассислар Махсус комиссиядан карантинга 28 кун сўраган. Оқилов ушбу қарорга касалликнинг занжирини узиш учун келинганини айтди. Агар ҳозир Ўзбекистонда касаллик занжири узилмаса қўшни давлатлардаги каби дорихоналарда дори, касалхоналарда эса койка-ўринлар етказиб бера олмаслик ҳолатига тушиб қолиш мумкинлиги таъкидланди.
"Айнан шу ҳолга тушмаслик учун карантин тартиби кучайтириляпти. Бу бир, икки ё уч ойга эмас, атиги 20 кунга қилиняпти. Атиги 20—21 кунда, Худо хоҳласа, шу занжирларни узиб олсак.
Биз Махсус комиссиядан иккита инкубацион даврни — 14 кундан 28 кун сўрагандик. Бизга: «Йўқ, халқ учун бу жуда қийин бўлади, 20 кун чидаб берсак ҳам катта гап», деб айтишди.
Биз Махсус комиссияни 20 кунга рози қилолдик. Агар ҳозир кескин чоралар кўрмасак, бунинг асоратлари фожиали бўлишини халқ тушуниши керак", - дейди Оқилов.
