Маҳалла ва оилани қўллаб-қувватлаш вазири Раҳмат Маматов карантинда муҳтож оилалар қаерга мурожаат қилиши мумкинлиги ҳақида гапирди. Вазир бу ҳақда бўлиб ўтган брифингда маълумот берди.
Вазирнинг айтишича, ҳомийлик, хайрияларни мувофиқлаштириш ва волонтёрлик марказларининг фаолияти республикамизнинг барча ҳудудларида яна қайта йўлга қўйилади. Карантин чекловлари жорий қилиниши муносабати билан ишсиз қолган, доимий даромад манбаини йўқотган ва эҳтиёжманд аҳоли қатламларини қўллаб-қувватлаш бўйича алоҳида тартиб жорий этилди.
Вазирлик томонидан ишсиз, доимий даромад манбаини йўқотган ва эҳтиёжманд аҳоли қатламларинининг манзилли рўйхати шакллантирилади.
Бу рўйхатга:
таъминот манбаи бўлмаган ёлғиз кексалар, ногиронлиги бўлган, боқувчисини йўқотган, оғир касалликка чалинган, кўп болали оилалар;
ижтимоий нафақаси ўз эҳтиёжларини қопламайдиган ва ундан бошқа даромад манбаига эга бўлмаган оилалар;
чин етимлар, бола тарбияси билан қариндошлари шуғулланаётган оилалар;
ота-оналаридан бири ёки ҳар иккиси ҳам ногирон бўлган оилалар;
14 ёшгача бўлган икки ва ундан ортиқ болаларни тарбиялаётган, бошқа қариндошларидан алоҳида яшаётган бева аёллар (бева эрлар);
ота-оналаридан бири ёки ҳар иккиси ҳам ишсиз бўлган ва иш изловчи сифатида бандликка кўмаклашиш марказларида ҳисобда турган оилалар;
меҳнатга лаёқатли аъзолари бўлган, бироқ ҳеч қаерда ишламайдиган ёки пандемия туфайли даромадидан вақтинча маҳрум бўлган, мавсумий ишчи, уста, мардикор, сартарош, чет элда ишини йўқотиб, ҳозирда даромадсиз қолган фуқароларнинг оилалари киритилади.
Шунингдек, эҳтиёжманд оилаларга ёрдам бериш учун “Маҳалла” фонди ва “Саховат ва кўмак” жамғармаларидан зарур маблағлар ҳам ажратилиши маълум қилинди.
Вазир жойлардаги маҳаллий ҳокимликлар, Қорақалпоғистон Республикаси ва барча вилоятлардаги ҳомийлик, хайрияларни мувофиқлаштириш ва волонтёрлик марказлари билан биргаликда манзилли рўйхат асосида зарур озиқ-овқат ва дори-дармон маҳсулотларидан иборат моддий кўмак ёрдамлари шакллантирилишини айтди.
Вазирлик томонидан ҳозирча муҳтожлик даражаси ўта юқори бўлган 101 минг 980 нафар фуқаронинг ҳудудлар кесимидаги рўйхати шакллантирилгани таъкидланди.
Жойларда тузилган рўйхатларда мавжуд бўлмаганлар, лекин шу билан бирга зарур нарсаларга муҳтож бўлган оилалар 1197 қисқа рақамига мурожаат қилишлари мумкинлиги айтилди. Вазир ушбу рақамга қўнғироқ қилганларнинг мурожаати ҳам алоҳида эътиборга олиниб, уларга ҳам ёрдам берилишини алоҳида таъкидлади.
