Санитария-эпидемиология назорати давлат инспекцияси бошлиғи Нурмат Отабеков коронавирус касаллиги кимларда белгиларсиз кечишини маълум қилди. Бу ҳақда кеча бўлиб ўтган брифингда айтилди.
"Коронавирус инфекциясини "симптомсиз" шаклида, яъни касаллик белгиларисиз ўтадиган шаклларида тана ҳарорати кўтарилмайди ёки субфебрил харорат бўлади. COVID-19 асосан ёшларда, иммун тизими юқори одамларда касаллик белгиларисиз кечади, чунки иммунитети нормал организм вируснинг тарқалишига қаршилик кўрсатади, лекин касалликни симптомсиз шакллари атрофдагилар учун хавфли ҳисобланиб, касалликни тарқалишига сабаб бўлади. Шуни назарда тутган ҳолда томоқ оғриғи ва йўтал белгилари пайдо бўлганида ҳам тиббий ёрдамга мурожаат қилиш мақсадга мувофиқдир", - дейди Отабеков.
Шунингдек, брифингда инспекция бошлиғи "Инсоният коронавирусни қачон енгади?" деган мазмундаги саволга қуйидагича жавоб берди.
"Инсоният вирус юқтириш ҳолларини камайтирса ҳам, бу ҳали пандемия тугайди, деганини англатмайди. Коронавирус яратган тўлқиннинг тиниши учун, балки бир неча йил керак бўлар. Ҳаётнинг баъзи жабҳаларига киритилган чекловларни узоқ муддатда ушлаб туриш қийин албатта.
Бу чекловларнинг ижтимоий ва иқтисодий бадали жуда катта бўлади.
Вирусни жиловлайдиган чекловлар бекор бўлиши билан яна тарқалиш ҳоллари ортиши мумкин. Аммо коронавирус йўқолиб кетмайди. Ҳаётни тезроқ нормал ҳолатга қайтарилиши эса айнан шу касалликни тугатилишига боғлиқ".
