Махсус транспортларни ўтказиб юборгани учун қоидани бузган ҳайдовчилар жазоланмайдиган бўлди. Бу ҳақда Адлия вазирлиги хабар қилди.
Маълум бўлишича, эндиликда кўк ёки қизил ёхуд кўк ва қизил рангли ялтироқ маёқчани ёққан ҳолда ҳамда махсус товушли сигналлар билан яқинлашиб келаётган транспорт воситасини ўтказиб юбориш жараёнида қоидани бузган ҳайдовчиларга жарима солинмайди. Таъкидлаш жоиз, аввалроқ бундай ҳолат учун жарима тўлаш ҳолатлари кузатилган эди.
Шунингдек, юқорида қайд этилган махсус транспорт воситаларининг ўтиб кетишига ҳалақит берган ҳайдовчилар бир йил давомида шундай ҳаракатни такроран содир этса 5 млн 575 минг сўм жарима тўлаши белгиланди.
