Фарғона вилоятининг Фурқат туманидаги 34-сонли мактабда компьютерлар ўғирланган. Бу ҳақда вилоят ИИББ хабар қилди.
Маълум бўлишича, ҳодиса шу йил 26 июль куни содир бўлган. Ҳозирда ҳолат юзасидан жиноий иш қўзғатилиб, тергов ҳаракатлари олиб борилмоқда.
Шунингдек, ушбу ҳодиса содир бўлгач мазкур мактабда ишлайдиган жисмоний тарбия ўқитувчиси Шуҳрат Жўраев ИИО ходимлари томонидан қийноққа солингани, у бир оёқда тик туришга мажбурлангани ҳақида хабарлар тарқалди. ИИББнинг маълум қилишича, ходимларнинг ҳаракатлари юзасидан прокуратура томонидан терговга қадар текширув ҳаракатлари олиб борилмоқда. Шу билан бирга, ИИББ томонидан ҳам ўз ходимларига нисбатан хизмат текшируви ўтказилаётгани билдирилди. Ушбу ҳолат вилоят прокуратураси назоратига олинган.
