Фарғона вилоятида хусусий боғчалар, сартарошхоналар, гўзаллик салонлари ва буюм ҳамда чорва моллари, қурилиш маҳсулотлари бозорлари фаолиятига рухсат берилди. Бу ҳақда коронавирусга қарши курашиш бўйича ишларни мувофиқлаштириш штабининг йиғилишида маълум қилинган.
Карантин қоидалари вилоятдаги эпидемиологик вазиятдан келиб чиқиб босқичма-босқич юмшатилиб борилиши таъкидланди. Бозорлар, савдо марказлари, хусусий боғчалар, сартарошхоналар, гўзаллик салонлари карантин қоидаларига қатъий риоя қилиш кераклиги белгиланди. Хусусий боғчаларда машғулотлар 15 нафар кишидан ошмаган гуруҳларда ташкил этилиши бегиланди. Шунингдек, у ерда доимий дезинфекция ишлари олиб борилиши, кириш ва чиқишда ҳарорат ўлчаниши ҳамда дезинфекцион тунеллар қўйилиши кераклиги таъкидланди. Худди шундай талабларга бозорлар ва савдо марказлари ҳам бўйсуниши кераклиги қайд этилди.
Сартарошхоналар ва гўзаллик салонларига эса ижтимоий масофани сақлаган ҳолда «Битта хизмат кўрсатувчи шахс – битта мижоз» тамойилига бўйсуниб, тиббий халат, тиббий ниқоб, юзни тўлиқ тўсадиган ҳимоя маскаси ва тиббий қўлқопдан фойдаланган равишда фаолият юритишлари белгилаб қўйилди.
