Бугун Маҳалла ва оилани қўллаб-қувватлаш вазирлиги матбуот котиби Саодат Боймирзаева иштирокида брифинг ташкил этилди. Унда вазирлик вакилига мамлакатда тўйларга қачон рухсат берилиши борасида савол берилди.
Хусусан, Боймирзаевага 22 августга қўшалоқ тўй белгилаб қўйган фуқародан савол келиб тушди. Фуқаро вазирлик вакилидан ўша санада тўй ўтказсам бўладими деган мазмундаги савол билан мурожаат қилди.
Боймирзаева эса фуқарога Ўзбекистонда карантин чекловларини фақатгина Республика махсус комиссияси қарорига асосан бекор қилиш ёки узайтириш мумкинлигини эслатди.
“Республика махсус комиссиясининг 2020 йил 26 июлдаги тегишли қарорига асосан, мамлакатимиз бўйлаб карантин чекловлари 15 августга қадар узайтирилиши муносабати билан тўй, оилавий маросимлар ва бошқа тадбирларни ўтказмаслик бўйича аниқ чекловлар келтириб ўтилган”, – дейди вазирлик вакили.
Ушбу чекловларни бекор қилиш, турли маросимлар ташкил этишга рухсат беришда махсус комиссия мамлакатдаги эпиемиологик вазиятдан келиб чиққан ҳолда қарор қабул қилиши таъкидланди.
“Сизга фарзандларингиз тўйини Республика махсус комиссияси қарори билан рухсат берилгандан сўнг ҳамда ўрнатилган қоидаларга қатъий амал қилган ҳолда ўтказишингизни тавсия этамиз”, – дея тавсия берди Саодат Боймирзаева.
Эслатиб ўтамиз, Ўзбекистонда карантин чекловлари камида15 августга қадар давом этади.
