Тошкентда 7-сонли шифохонанинг катта ҳамшираси Мансурова Наргиза Аҳмедовна вафот этди. Бу ҳақда журналист Юлдуз Файзий маълум қилди.
Мансурова мазкур шифохонада 28 йил давомида фаолият юритди. У коронавирус тарқалиши кучайган вақтда ҳам беморлар ҳаёти учун курашди. Лекин, бахтга қарши Мансурованинг ўзи ҳам вирус юқтириб олди. Мансуровани ўша шифохонада ўзининг ҳамкасблари даволади. Лекин кўрсатилган тиббий муолажаларга қарамай тиббиёт ходими вафот этди. Мансурованинг 3 нафар фарзанди бор, уларнинг отаси йўқ. Давлат томонидан ваъда қилинган 250 млн сўм пуллар эса берилмаган. Бу ҳақда марҳумнинг фарзандлари журналистга маълум қилган.
“Мен онамдан нима ейсиз деб сўрадим. У жавоб бермади. Кейин мен онамнинг шифокорга ҳаво етишмаётгани ҳақида айтаётганини эшитиб қолдим. У кислород сўради. Онам фарзандларига керак эканини айтарди. Бахтга қарши онамни асраб қолишнинг иложи бўлмади”, – дейди Мансурованинг қизи.
Марҳумнинг катта қизи ўз оилали. Иккинчи қизи онаси билан бирга ишлайди. У олийгоҳда ўқийди ва контракт пулини тўлаши керак. Кенжа қизи эса 13 ёш. Оиланинг ўз уйи йўқ. Журналист томонидан ушбу маълумот эълон қилингач кўплар ёрдам беришни таклиф этди. Юлдуз Файзий марҳумнинг қизининг пластик картаси рақамини эълон қилди. ССВ ҳозирча ушбу ҳолатга изоҳ бергани йўқ.
